كلّمني عن نفسك

دي مش دعوة إنك تتكلم عن نفسك بغزارة، ح تتكلم عن خلفيتك وصفاتك المهنيّه مش حياتك الشخصيّة، بس حاول معرفة الهدف الحقيقي للسؤال بإنك تسأل عن إمكانية تحديد حاجة معينة –مثلا مؤهلاتك أو نفسك- للتحدث عنها، وده ح يساعد المقابل على توجيه الحديث للمسار المناسب. تجنب الأحاديث غير المهمة.

ما نقاط قوتك؟

جهّز الإجابة اللّي تزوّد فرصك في النجاح، والمفروض اللّي ح تقوله يكون قابل للإثبات، إما من خلال المقابلة أو من خلال الخبرات السابقة، وخلّيك معقول وقابل للتصديق.

ما أكبر إنجاز حققته؟

خلّي إجابتك موجزة ومرتبطة بالوظيفة، واشرح إزاي حققت الإنجاز ده، وماتبالغش عشان فخرك الزائد ممكن يؤخذ ضدك. وممكن يكون غرض السؤال هو الكشف عن ملامح معينة في شخصيتك زي التحدي أو عدم الاستسلام.

ما نقاط ضعفك؟

خلّيك صادق واذكر نقطة ضعف حقيقية، لكن اختار ما لا يؤثّر على قدرتك على أداء العمل أو الوظيفة أو اذكر نقطة ضعف تقدر تتغلب عليها واظهر قدرتك على كده.

اذكر ثلاث صفات تعتقد أن الآخرين يصفونك بها.

ذِكْرك لعيوبك يدل على أمانتك، لكن ده مش معناه أن تَذْكر العيوب فقط، كمان لاحظ إن مبالغتك في تقدير ذاتك ربما تكون دليل على غرورك.

ما أكبر فشل واجهته؟

اللّي ح يقدر يجاوب على السؤال ده هوّ بس اللّي عمل تقييم لنفسه، وعشان تجاوب السؤال ده خلّيك صادق وقول فشل واجهته فعلاً، لكن في نفس الوقت اشرح أسباب الفشل ده واشرح ليه مش ح يحصل تاني، وبرضه حاول تختار حاجة مش متعلقة بالعمل.

التعامل مع المديرين:

أظهر حرصك على الاحترام واتباع الإرشادات والثقة المتبادلة، ولو سألوك عن مديرك السابق إياك أن تنتقده! اتكلّم عنه بشكل كويّس مع عدم تقليل شأنك أو إغفال دورك.

صف أكثر الرؤساء مثالية وأقلهم مثالية من وجهة نظرك.

هذا السؤال يقيس قدرتك على التصرف مع مديرك والمقياس هنا هو مدى التشابه بين مدير الوظيفة المطروحة وأكثر المديرين مثالية من وجهة نظرك.

ما الذي يجعلني أختارك؟

خلّي إجابتك قصيرة وفي صميم الموضوع، ولَخّص ما قاله المقابل عن العمل نقطة نقطة، مع الربط بمهاراتك وإمكانياتك، وقول إنك تمتلك المواصفات اللي يحتاجها.

ما المهارات الشخصية التي تعتقد أنك تمتلكها ولا توجد في المتقدمين الآخرين والتي تتناسب مع هذه الوظيفة؟

قدراتك الملموسة مثل إلمامك باللغات أو معرفتك بالكمبيوتر ليست هي أساس تميزك، كما أنه يسهل قياسها. السؤال ده يساعد على تحديد كيفية رؤية الشخص لمواهبه ومواطن قوته الشخصية. حاول تركز على ما يميزك عن الآخرين مش بس قدراتك المتعلقة بالوظيفة.

ما الذي تحب أن تصل إليه بعد 5 سنين من الآن؟

لازم إجابتك توضّح مدى خبرتك واحترافك المهني. ولازم يكون عندك فكرة عن الشركة عشان تجاوب السؤال ده. ممكن يكون عندك فكرة عن الفرص المتاحة بالشركة من خلال المعلومات اللّي جمعتها عنها، وبالتالي لازم تتكلم عن طموحاتك إنك تنضم إلى الأقسام الواعدة في الشركة.

وعامةً لو سألوك شايف نفسك إيه بعد أيّ عدد من السنين، ده يختبر رؤيتك ووضوح تفكيرك، ولازم إجابتك توضّح إنك فكرت في المستقبل. ممكن تكون التفاصيل غير مطلوبة، لكن لازم تكون واضح.

إيه أصعب موقف واجهته في حياتك العملية؟

الإجابة تتكوّن من جزأين: أولاً: تعريفك للمصاعب، وثانياً: كيفية تصرّفك في المواقف دي، عشان كده لازم تحكي موقف صعب مرّيت بيه واتصرّفت كويّس وحلّيته، وتجنَّب المواقف المرتبطة بزملاء العمل.

تفضَّل العمل لوحدك ولاّ في فريق؟

خلّي بالك، المقابل يحاول يصنّفك في فئة معيَّنة، وده مش في صالحك. معظم الأعمال دلوقتي تحتاج للعمل بانفراد، وكمان في فريق. عشان كده لازم تقول إنك ناجح في كلا النوعين، وبعدين تذكر مثال لحاجة عملتها بكلا الطريقتين. الطريقة دي في الإجابة تنجح كل ما تتسئل سؤال ثنائي ماكر زيّ ده.

و ممكن يكون الهدف من السؤال هوّ معرفة ما إذا كنت تنسجم مع العمل الجماعي، فلازم تتأكد قبل الإجابة ما إذا كان العمل يتطلّب العمل منفرداً ولاّ ممكن يكون جماعيّ، وبعدين جاوب الإجابة المناسبة، زي "عادة أكون سعيدا بالعمل منفرداً لو العمل يتطلّب كده، لكنّي أفضّل العمل في فريق لأن ده ح يساعد على إنجاز الكثير".

السن صغيّر/ كبير؟

لو كنت صغير السن لازم توضّح خبراتك اللّي اكتسبتها متضمنةً التدريبات اللّي عملتها ومهاراتك المختلفة. لكن لو كان سنّك كبير، وضّح مزاياك، مثلا إنك
ح تحتاج ساعات تدريب أقل، وإنك تقدر تتّخذ قرارات بسرعة نتيجة خبرتك الطويلة.

مش شايف إن مؤهلاتك أعلى من المطلوب للوظيفة ؟

لو الوظيفة فعلا أقل من مؤهلاتك لكنك محتاج لها، قول إنك تتطلّع لشيء جديد مختلف وحيوي، وإنك تقدر تتلقى التعليمات زيّ ما تقدر تصدرها.

المرتب المتوقَّع؟

خلّي بالك، لو قلت رقم عالي جداً ممكن تخرج من المنافسة ولو قلت رقم منخفض، ح يشكّوا في قدراتك، وكمان ممكن تكون الخسران في المستقبل.

عموماً، النصائح دي ممكن تفيدك في الموقف ده:
- حاول تعرف مستويات الرواتب في الشركة قبل المقابلة.
- حاول تأخّر إعطاء رقم لغاية ما يعرفوا خبراتك وإنهم ح يستفيدوا منّك وعاوزينك. وممكن تقول إنك ح تَسْعَدْ بمناقشة ده لما تعجبهم خلفيّتك ولما يكون هناك رغبة متبادلة في تعيينك.
- ممكن تقول إنك تفضّل عدم تحديد رقم الآن، وإنك متشوّق للوظيفة، وإنك تتوقَّع منهم أحسن عرض يكون مناسب ليهم.
- ممكن تسألهم عن حدود المرتب، ولما يجاوبوا، قول إن توقعاتك تتماشى مع الحد الأعلى للمرتب (مادام ده صحيح).
- ممكن كمان تقول إن فيه عناصر كتيرة للوظيفة، المرتب واحد منها ومش أهمها، بل الأهم هو جودة الوظيفة، فرص التطور،....... الخ.
- تذكر أن أول من يحدد رقم هو الخاسر.

ح تكون جاهز للعمل من إمتى؟

قول: "في أسرع وقت ممكن"، ولا تضع أيّ عقبات.

لاحظ إن مش ضروري أن تجد هذه الأسئلة في كل مقابلة، لكن إحنا نحاول نفكر مع بعض ونستفيد من بعض الخبرات السابقة...