من أول وجود ديمقراطية حقيقية في مصر.. ونهاية بنظافة الشوراع.. كانت "أحلامــــ....كو!" الجماعية المصرية مية بالمية...

وبين الديمقراطية ونظافة الشوراع.. كان في أحلام تانية كتييييييييييييرة...
تطوير التعليم.. مكافحة الأمية.. التخصص في صناعات تجلب دخلا كبيرا كالبرمجيات.. الاهتمام بالمشروعات الصغيرة.. حل مشكلة المواصلات والزحام الخانق.. القضاء على الروتين والمحسوبية.. القضاء على البطالة وتوفير فرص عمل للشباب.. القضاء على السلبية والأنانية والأنامالية..

وأحلام تانية كتير كتبتوها بقلوبكم وعقولكم ومشاعركم.. وأكدت كلها إننا كلنا فعلا بنحب البلد دي وإننا -فعلا- نفسنا إننا نطور فيها ونضيف إليها ونقضي على كل مظاهر التأخر المعششة فيها..

ولأننا في "بص وطل" بنحلم زيكم ومعاكم..
وبنحلم إن يكون عندنا حلم جماعي نحاول كلنا إننا نحققه..
فاحنا عاوزين نبدأ من أول السطر..
من أول كلمة..
من أول حرف..
من نفسنا..
من أسرتنا وبيتنا وشارعنا وحارتنا...

وخلينا نفكر مع بعض..
ازاي ممكن نكون قادرين على إننا نطالب بكل قوة بنظام ديمقراطي كامل 100%؟

إمتى نكون قادرين على إننا نجبر المسئولين على تطوير مناهج التعليم ونخليها عصرية متطورة بعيدة عن الحشو والحشر واللت والعجن؟

إمتى ممكن نقدر نحارب الأمية وننتصر عليها.. ولاّ نحل أزمة المواصلات.. ولاّ نفكر مع بعض في حل جماعي تصاعدي لأزمة البطالة يقلل من نسبتها تدريجيا..؟

نقول لكم احنا إمتى؟!
لما يبقى عندنا " Anti... سلبية!"

سامعين واحد بيضحك قوي وهو بيقول:
"إيه ياعم "Anti... سلبية" ده؟ ويا ترى حبوب ولاّ كبسولات؟ وبناخدها كام مرة في اليوم؟"

لا يا سيدي دي لا حبوب ولا كبسولات.. ومش بتاخدها 3 مرات في اليوم ولا كل 6 ساعات.. لأن "Anti... سلبية" ده –ولا مؤاخذة- بيتزرع مش بيتشرب!
آه والله..

أن يبقى عندك مضادات للسلبية دي حاجة إنت واللي حواليك بتزرعوها جوه بعض.. مش بتشتروها من الصيدلية ولا السوبر ماركت..

أيوه هي دي بقى يا سيدي الحاجات التي لا تقدر بثمن إلا إنها في نفس الوقت غالية الثمن جدا..

لو عندك مضادات للسلبية..

مش هتشوف حاجة سلبية إلا وتعترض عليها..
ومش بس بتعترض عليها وتسكت.. لأ ده إنت لو عندك تركيز عالي من "مضادات السلبية" هتقدر تعترض وتغير الحاجات السلبية اللي بتشوفها كمان..
المشكلة الأكبر إننا في أوقات كتيرة مش بنكون شهود صامتين على السلبيات.. لأ ده احنا في أحيان كتيرة بنكون احنا نفسنا المسئولين عنها.. ودي بقى الكارثة..
لأننا تدريجيا بتحتلّنا السلبية.. وتنتشر وتتوغل في كل سلوكياتنا.. وبيحصل عندنا كمان نوع من أنواع "الحول السلوكي!" -آه والله- تخلينا نشوف السلبيات إيجابيات والإيجابيات سلبيات.. شوف إنت بقى حالنا يبقى شكله إيه..

لو عاوزينا نحقق أحلامنا بجد
 لازم الأول نكون إيجابيين في كل حياتنا..

ماتشوفش غلط وتسكت عليه..
ماتشوفش حرامي بيسرق جارك وتقول وأنا مالي.. ما هو بكره هييجي بيتك ويسرقك برضه..
ماتشوفش واحد بياخد رشوة.. وتسكت وتقول ده غلبان..
ماتشوفش غش في مدرستك ولا جامعتك وتسكت وتقول عادي..

الأمور كلها دخلت على بعضها..
الغلط بقى صح..
والصح بقى موضة قديمة ومالوش مكان وسطنا..
وعلشان أحوالنا تتحسن..
لازم مانخافش..
لازم نبدأ بنفسنا..
نبص جوانا وحوالينا..
ونواجه نفسنا بأخطائنا..
قبل ما نلوم المجتمع والحكومة وأمريكا وإسرائيل والدنيا كلها..
نبطل نعيش على عظمة أجدادنا الفراعنة ونبتدي نفكر مع بعضنا..

قولوا لنا رأيكم المهم جدا بالنسبة لنا
ازاي ننفض للسلبية والأنانية والأنامالية؟
البلد دي بلدنا كلنا..
وبلد أولادنا من بعدنا..
ممكن نتغرب ونبعد لكن مسيرنا راجعين ليها..

يلاّ يا مصري..
فكر معانا كده ويا ريت تقول لنا..
ازاي نحقق حلمنا ونبقى ناس "إيجابيين"؟