في أي ألبوم نفتحه نلقى صور

إلا انت ألبومك عجب.. مليان عبر..

مليان كلام.. ما أحكمه!!!

أحلام جميلة في قلوب الحالمين.. ما أجمله!!!

أنغام بديعة تسعد القلب الحزين.. ما أبدعه!!!

صورة بتجمع كل شمل الحيرانين... ما أروعه!!!

لكننا.. يا هل ترى نقدر ندقق في الصور؟

اسمح لي يا عمي صلاح

طالب أنا منك سماح

إني أدقق في الصور

واكتب كلام عن طلتك..

عن بسمتك..

عن ضحكتك..

عن لمتك..

عن دنيتك..

وان كان هرب مني الكلام

برضك سماح.. لا مؤاخذة يا عمي ويا خالي ويابويا "صلاح"..

يا عم ليه سبتنا في الدنيا وحدينا
وانت اللي شاعر بنا.. حافظ خطاوينا
مين تاني ممكن يكون حاسس بأحلامنا؟
مين تاني ممكن يكون مرسى وأمان لينا؟
وعجبي

اللعب ع الرمل كان لعبتك
تلعب.. وتعلا فـ السما ضحكتك
وانت بتبني قصور ع الرمال بالرمال
 والكل عارف إن دي غيتك.....
وعجبي

سبع صنايع وضايع بختك يا عم صلاح..
الضحك كان لعبتك، والقلب كان نواح..
بتداوي كل القلوب بالبلسم الشافي..
وان شفنا قلبك في يوم هنلاقي كله جراح.....
وعجبي

حاطط إيديك ع الخد ليه يا جاهين؟
وانت اللي راسم ضحكة الملايين..
شايل هموم البشر والدنيا دي بحالها..
والعين تشوفك تقول: يا عيني يا مسكين......
وعجبي

يا حبيبتي يا "سوسنة" يا فارشة ضليلة..
ع البيت.. أمينة.. وبهاء.. ومجمعة العيلة..
عينك بحور الصفا والحب والأحلام..
بتشيلي عني الهموم.. وتخففي الشيلة..
وعجبي

دلدل رجولك يا بهاء..
وارفع جبينك للسماء..
وامسك بإيدك في النجوم..
علشان تحقق لي المنى.. كل المنى... كل الرجاء..
وعجبي