|
دايما بيتهموا التليفزيون المصري إنه بيتأخر وإنه بيغطي الحدث بعد ما ينتهي أساسا، يعني بعد خراب مالطة وإن كل اللي بيتقال عن "الريادة" الإعلامية مالوش أساس من الصحة.. لكن لما نلاقي التليفزيون المصري ينفرد بتغطية حدث مهم هنا لازم نقف ونفكر.. ازاي؟ ومنين؟؟
قد لا يعرف البعض أن قناة النيل للأخبار عملت انفرادا وللمرة الأولى بتغطيتها لتفجيرات شرم الشيخ وأن جميع القنوات الفضائية في العالم نقلتها عنها لأول مرة!!!!
هتقول لي ازاي؟؟؟ أقول لك ازاي؟؟؟
قبل ما تحصل التفجيرات كان في شرم الشيخ بطولة دولية للبولينج وكان ضروري إن يتم تغطيتها؛ عشان كده توجه فريق عمل من قناة النيل للرياضة إلى شرم الشيخ وكان بيضم المذيع "خالد لطيف"، وهو بالمناسبة معلق كروي أيضا، مع المصور "سامح عبد العزيز" والمخرج "محمد عفيفي" ولما شافوا النار والعة افتكروها جزء من الاحتفالات فراحوا بسرعة يغطوه وإذ فجأة اكتشفوا حقيقة الانفجارات..
وطبعا كان لازم يتم استغلال وجود البعثة هناك فاتصل "خالد لطيف" برئيس قناة النيل للأخبار ورئيس القنوات المتخصصة ورئيس التليفزيون ووزير الإعلام..
نذيع يا باشا؟؟؟ عايز تذيع ذيع!!!
وفورا بدأ النقل على الهواء مباشرة من قلب الأحداث للعالم كله بعد ساعة واحدة من وقوع الانفجارات واستمر النقل لمدة 9 ساعات لغاية لما وصلت كاميرات قناة النيل للأخبار.
وقد أكد "حسن أبو العلا" معاون وزير الإعلام للمصري اليوم أنه شعر بالفخر الشديد لأول مرة عندما رأى قنوات مثل "فوكس" و"سي إن إن" و"الجزيرة" و"العربية" تنقل عن التليفزيون المصري.
طبعا الموضوع كله كان بالصدفة البحتة ولولا وجود بعثة النيل للرياضة كان زمان بعثة الأخبار بدأت النقل بعد وصولها يعني بعد 9 ساعات!!! فين بقى الريادة الإعلامية؟؟؟!!!!
إن كنا نقول ذلك فلابد أن نفعله.. لابد من توفير مراسلين في كل مكان حتى يتم تغطية الأحداث لحظة وقوعها وليس بعد انتهائها عشان يبقى فيه انفرادات إعلامية بجد مش مجرد انفراد..
بالصدفة!!! | 
ساحة النقاش