فيه ناس كتير مغشوشة وناس كتير مش عارفة ويقولوا لك إيه يا أخي البنت زي الولد والستات واخدين حقوقهم تالت ومتلت والستات مفتريين وحقوق مرأة إيه اللي بتطالبوا بيها ده المفروض ندور على حقوق الرجالة..

لكن كل ده ظلم وافترا لأن الواقع بيقول إن المرأة مقهورة..
مقهورة..
مقهورة.

أيوه والله مقهورة ومش زي الولد ولا حاجة ولا واخدة حقوقها، بل بالعكس دي حتى شوية الحقوق اللي عندها مش بتعرف تستخدمها أساسا..

ناس كتير وبالذات الرجالة طبعا هيشوفوا كلامي ده جنان أو يمكن تحيز ويقولوا إني من "جمعية المرأة المتوحشة اللي بتهاجم الذكورية المتعفنة".. لكني مش متحيزة ولا عضوة في أي جمعية للمرأة وهاثبت ليكم كلامي بالدليل القاطع والبرهان الساطع..

نبتدي الأول بالحقوق اللي المفروض إن المرأة واخداها زيها زي الرجالة مثلا يعني التعليم والعمل..

فهنلاقي إن في المناطق العشوائية وساعات في الريف والصعيد بيفضلوا تعليم الولاد بدل البنات وكتير منهم بيعلموا البنت لغاية ابتدائي أو إعدادي بالكتير وبعدين يخليهم يسيبوا التعليم ولو مش مصدقين فأحب أقول معلومة وهي إن نسـبة أمية الرجال تقريبا كده 35 % أما المرأة بقى فقليل خالص 65 % بــس!!!!

والعمل مابيختلفش كتــير فـهنــلاقي إن نـسبة البـــطالة في الرجــالة 5.9 % تقريبا في حين إنها عند المرأة 24 %!!! شفتم المساواة!!!!

ده غير إن فيه أحوال كتير لما المرأة بتلاقي شغل مابتخلصش من معاكسات صاحب العمل اللي يا توافق على كلامه يا تسيب الشغل!!!
والإحصاءات دي ذكرتها المنظمة المصرية لحقوق الإنسان يعني مش تجني ولا افتكاسة..

أما بقى في القانون فحدث ولا حرج.. شوف يا مواطن قمة الظلم لما تلاقي في حالة الزنا العقوبة للراجل جنحة وللست جناية.. ليه؟؟؟

يعني لو الراجل خان مراته ياخد بالكتير ست شهور حسب المادة 277 من قانون العقوبات ولو الست خانت جوزها تاخد سنتين حسب المادة 274 يعني قد الراجل 4 مرات.. شفتم ظلم وافترا أكتر من كده..

أما بقى لو الراجل فاجئ الست مراته وهي بتخونه وقتلها فهو دفاع واضح عن الشرف عقوبته إن ماكانتش البراءة أو حكم مع إيقاف التنفيذ هيكون كبيره حبس فقد جاءت المادة 237 لتخفض العقوبة على الراجل من عقوبة القتل العمد إلى الحبس يعني بدل الجناية بقت جنحة!!! أما بقى لو الست دخلت وشافت جوزها بيخونها على سريرها فهي قاتلة تعاقب عقوبة القتل العمد!!!!

ده غير بقى اللي بيقتل أخته ولاّ خطيبته ولاّ بنته لشكه في سلوكها والبنت يا عيني تطلع مظلومة وبعد ما تموت يقولوا إنها لسه عذراء والقاتل قتلها دفاع عن الشرف!!! شفتم القرف!!!

ده غير قضايا الدعارة والآداب يعني مثلا لو واحد نزل الشارع قابل واحدة من إياهم واتفقوا يقضوا ليلة سودا على دماغهم وإذ فجأة طب عليهم البوليس تتعاقب الهانم على إنها قضية دعارة، ويتعمل لها ملف والبيه اللي كان معاها يقف في المحكمة بكل ثقة وفخر ويحكي للقاضي تفاصيل اللقاء وقد إيه الهانم دي مذنبة ويخرج هو شاهد ملك!!! يعني بياخدوه شاهد على اللي كانت معاه في الـ..

نيجي بقى للسياسة.. المرأة المصرية واخدة كل حقوقها السياسية.. لكن تعالوا نشوف سوا.. ذكرت صحيفة أخبار اليوم أن الدكتورة "جورجيت قليني" شنت هجوم على الأحزاب بسبب عدم ترشيح أي حزب لأي امرأة لدخول انتخابات مجلس الشورى.. يعني ولا حزب مرشح واحدة ست.. ولو جات لها الشجاعة ونزلت مستقل كام واحد في مصر هيرشحها؟؟؟

ثم إن المنظمة المصرية لحقوق الإنسان جاء في تقريرها السنوي 2003 أن نسبة المرأة في مجلس الشعب 2.4 % من الأعضاء يعني مهزلة نصف المجتمع أو أكتر شوية بيمثلوه 2.4 % من نواب المجتمع!!!!

نيجي بقى للمهم.. العنف ضد المرأة.. شوف يا مواطن.. نشرت صحيفة المصري اليوم إن الإحصاءات أكدت أن واقعة عنف ترتكب ضد المرأة في مصر كل 4 دقايق.. كل 4 دقايق يعني رقم قياسي!!!

فالعنف أحيانا قد يأتي من المرأة نفسها التي تظن أنها بذلك تحمي ابنتها مثل حالات الختان.. والعنف قد يكون عنفا جسديا بالضرب أو الاغتصاب وقد يكون عنفا لفظيا بالسب والإهانة والتجريح والسخرية..

كل ده مش مهم، المهم بقى هو الثقافة الشعبية بمعنى إن الناس بتعامل الأولاد والبنات زي بعض فعلا ولاّ لأ.. الحقيقة إن البنت من صغرها لازم تسمع كلام باباها وأخوها ولو كبرت يبقى لازم تسمع كلام جوزها.. ولو جوزها خانها لازم تستحمل وترضى وتحافظ على البيت أما جوزها فهو غلط وخلاص.. نزوة وتعدي!!!

أما بقى لو هي خانت جوزها تبقى... وإما إنه يطلقها ده لو طلع جنتلمان أو الحل التاني إنه يتاويها ويغسل عاره ده إن أبوها ولاّ أخوها ماسبقهوش ولو افترضنا قمة التحضر في أي راجل هنلاقي إنه حتى لو ماعملش حاجة فهو مستحيل يسامحها ويكمل حياته معاها على عكس الست اللي المفروض تسامح وتنسى مش بس كده وتحاول ترجع جوزها ليها وماتخليش واحدة تانية تخطفه!!!

ولو البنت اتأخرت في شغلها تبقى مش مؤدبة ويطلع عليها كلام وتبقى هي اللي بتجيبه لنفسها، ولو واحد عاكسها يبقى هي اللي برضه بتجيبه لنفسها إيه اللي ينزلها لوحدها في ساعة زي دي..

يعني من الآخر الست مظلومة في القانون وفي الواقع وبتتعرض للضرب والاغتصاب والتحرش والمعاكسات ده غير العنف اللفظي بأفظع الشتايم.. وفي الآخر يقولوا واخدة حقها.. هو فين حقها ده؟؟؟

أنا مش بانكر إن الست المصرية حصلت على بعض الانتصارات اللي منها منح الجنسية لأبناء المصريات المتزوجات من أجنبي وإلغاء القانون الظالم اللي كان بيسقط العقوبة عن مغتصب الفتاة إذا تزوجها وطبعا قانون الخلع.. لكن أكيد أكيد لسه بدري وأكيد أكيد الست لسه مظلومة وعايزة حقها.. قصدي حقوقها.

واللي بيقولوا مش لما الراجل ياخد حقوقه الأول ماهو مقهور برضه.. فالست مش واخدة حتى شوية الحقوق اللي واخدها الراجل ده حتى الحقوق اللي المفترض إنها واخداها مش متمتعة بيها فعلا.. يعني من الآخر...

المرأة مقهورة.. مقهورة.. مقهورة.. يعني لازم ندور على حقوق المرأة ونرجعهالها!!!