كان هذا أول سؤال سألته لنفسي وأنا أرى على شاشات الفضائيات وصفحات الجرائد ناس كتير قوي محموقة ومنفعلة ع الآخر ورافضة تماما لفكرة "أن تكون هناك مراقبة دولية على الانتخابات الرئاسية الأولى التي ستجرى في مصر في سبتمبر القادم" ماشي ياعم حقكم..

بس فعلا صحيح "مالها المراقبة الدولية؟!"

ما كل دول العالم الحر "واخدين بالكم من الحر دي" عادي جدا إنهم يستقبلوا لجنة من الأمم المتحدة ولاّ من الاتحاد الأوروبي ولاّ حتى من أمريكا حتى تراقب الانتخابات التي تجرى فيها، والعالم الحر ده مش بالضرورة يكون دول أوروبية لأ ممكن جدا تكون الدول دي إفريقية أو حتى عربية" ده فلسطين المحتلة يا جدع -المحتلة واخد بالك- كانت ممتلئة بلجان المراقبة الدولية عندما أجريت الانتخابات الرئاسية بعد وفاة عرفات" ولاحد طلع يرغي ويزبد ويقول لك "لأ بلدي بلد طاهر لا يمكن أن تدنسه أقدام أعضاء لجان المراقبة الدولية!" ولا سمعنا عن واحد يعتبر قدوم بعض الرجال المحترمين للتأكد من نزاهة الانتخابات في هذا البلد أنه احتلال مقنع ولأنه "وطني ووطنطن وف حب الأوطان متسلطن" فإنه يرفض قدوم هؤلاء الأوغاد!

أزعم أن الأمر أبسط من هذا بكثير..قول لي ليه؟ أقول لك ليه..

مش ياعم في ماتش الأهلي والزمالك دايما بيجيبوا حكم أجنبي قال إيه عشان نضمن نزاهة الحكم عشان الحكام المصريين ممكن يميلوا لفريق على حساب فريق تاني.. مش ده بيحصل.. يبقى بقى إيه المانع إنك تستضيف لجنة مراقبة دولية وهي بالمناسبة مش حكم لمباراة الانتخابات الرئاسية.. لأ يا سيدي.. إنت عارف لجنة المراقبة الدولية دي زي مراقب لجنة الحكام اللي بيبقي موجود خارج الملعب ومالهوش أي سلطات على قرارت الحكم أثناء المباراة.. كل اللي بيعمله إنه بعد المبارة ما بتخلص بيكتب تقرير عن المباراة واللي حصل فيها.. وبعد كده بيرفعه لاتحاد الكرة.. اتحاد الكرة بقى اللي له الحق كله في أن يوقع عقوبات على الفريق الأول أو الفريق التاني ولاّ حتى الحكم.. وجايز جدا لا يوقع أي عقوبات لو كانت المباراة سليمة ونظيفة ومفيهاش أي ضرب من تحت الحزام أو أي تجاوزات... تبقى فين المشكلة لو كانت فيه مراقبة دولية على الانتخابات الرئاسية في مصر؟

وبعدين المفترض المفترض إن الانتخابات الرئاسية اللي جاية تبقى فل الفل.. يعني مفيش أي تجاوزات أو أي ضرب نار أو ضرب تحت الحزام أو أي انتهاكات "من النوعية اللي كانت موجودة في الاستفتاء على المادة 76" يبقى هنخاف من إيه؟!

الأمر أشبه بواحد سايق عربية.. ورخصته سليمة وشادد على نفسه حزام الأمان ومعاه طفاية الحريق بتاعته والعربية مية مية مفيهاش خدش واحد.. يبقى لما يقرب على لجنة ولاّ كمين يخاف ويرتعش ليه.. مش ورقك سليم يا عم.. تخاف بقى لو كنت سارق العربية أو مش بتعرف تسوق أو مامعكش رخصة.. مش كده ولاّ إيه؟!

أما الكلام بخصوص التدخل الأجنبي في الإرادة المصرية والكلام الكبير ده.. فأعتقد أن لجان المراقبة الدولية لا يكونون مدججين بالسلاح ولا تحميهم قوات المارينز الأجنبية.. دول شوية ناس لطاف سلاحهم عيونهم وورقة قلم "جايز يكون معاهم لاب توب!" كل اللي هيعملوه إنهم هيكتبوا في تقريرهم اللي شافوه بعيونهم مش اللي شافته عيون ناس تانيين.. ودمتم.. لا حد فيهم هيجبر واحد مصري غلبان زيي وزيك إنه يعطي صوته لمرشح بعينه، ولا واحد فيهم هيرفع تقرير لدول المحور والحلفاء ليقر فيه بأن مصر جرت فيها انتخابات ديمقراطية نزيهة ولذا يجب احتلالها!

يا جدعان حد يفهمني بس... "مالها المراقبة الدولية؟!"