وشوشات

بقيت بتتجنب لقاه... مش عاوز ترد على تليفوناته... بتتخنق لما تشوفه... ومش عارف تعمل إيه؟ وبتستغرب إن ده بيحصل ليك وبتدور على سبب يخليك تستمر في العلاقة وكمان مستني له الغلطة. بقيت بتشوف إن علاقتكم واستمراريتها على المحك.

اعترف... ماتقاوحش مافيش فايدة من العناد....... أيـــــــــوه مشاعرك اتغيرت... لازم تعترف بالحقيقة مهما كانت قاسية.

فترة وتعدي ولا؟

أول تبرير للحالة اللي إنت فيها دي إنك هتقول إنها فترة فتور في العلاقة وتعدي، أو بسبب مشكلة معينة حصلت مع الطرف التاني. لو حالتك كده خد وقت تفكر فيه كويس واقعد مع نفسك قعدة صدق وصراحة، لو نفعت كان بها، لكن لقيت نفسك بتراجع علاقتك القديمة وكل اللي حصل فيها مع الطرف التاني يبقى اتأكد من تبدل مشاعرك.

مشاعري اتغيرت ليه؟

أكيد ده أول سؤال بتطرحه على نفسك، وممكن كمان تفضل تقنع نفسك إن دي فترة وهتعدي وكده، بس اللي عاوزة أقوله ليك إن مفيش فايدة من إجابته. لأن إجابته مش هتضيف لك حاجة جديدة.

طيب هتعمل إيه؟

إنت دلوقت اتأكدت من إنك ماعدتش زي الأول. فيه مسئوليات تجاه الطرف التاني لازم تقوم بيها، وخاصة لو كان متعلق بيك، وكمان ماكانش السبب في الحالة اللي إنت وصلت ليها، أو إن يكون تغير مشاعرك ده بسبب دخول شخص آخر حياتك.

من حقه يعرف

لازم تعرف إنك لازم تصارح الطرف التاني من العلاقة بإن مشاعرك اتغيرت تجاهه. بس ده لازم يتم بأسلوب لطيف، لأن كفاية عليه صدمته إن الحب اللي في قلبك له خلاص خلص. لكن في نفس الوقت كلامك لازم يكون قاطع وحاسم، يعني ماتخليهوش يفتكر إن فيه أمل إنكم ترجعوا لبعض، ماتقبلش بأي تنازلات يوعدك بيها، ده أحسن ليك وليه... ليك علشان مش هيخليك تشعر بالذنب تجاهه، وله علشان يواصل حياته من بعدك.
م الآخر تخيل إنك الطرف التاني في العلاقة وتصرف على الأساس ده.

حاجات مش لازم تحسها

1. إنك جبان وندل لأنك سبت الطرف التاني لأن مشاعرنا مش بإيدينا.
2. إنك لازم تقوم بدور الشهم وتكمل المشوار معاه غصب عنك لأنك في الآخر هتكتشف إنك هتعيش تعيس وهتتعس اللي حواليك.

كلام مش لازم تقوله

1. "خلينا أصحاب أحسن" أو "خلينا إخوات" لأنك بالجملة دي بتجرحه أكتر وبتبين له قد إيه هو كان غلطان في الحكم على مشاعره.
2. اوعى تقول "احنا كنا بنقضي وقت لطيف مع بعض" لأنك بكده هتكسب "احتقاره" ليك للأبد.
3. إياك وجملة "أنا عمري ما قلت بحبك"، حتى لو كنت ماقلتهاش فعلا، لأن مجرد تواجدك معاه بالنسبة له كان بينقل له حبك.

الحالات اللي بنتكلم فيها دي كلها علشان ماحدش يفهمنا غلط، هي مرحلة ما قبل الزواج، لكن بمجرد مابتاخد قرار الجواز مابتبقاش لوحدك، وحتى لو مشاعرك اتغيرت الحكاية بتبقى ليها حسابات تانية خالص.