حضرتك دلوقتي بتتكلم عن الناس اللي بره الزمالك.. أنا عايزاك تتكلم عن الناس اللي جوه الزمالك.. مثلاً نيجي للاّعيبة.. أنا باشوف وأنا ماشية في المهندسين.. حد لعب ماتش حلو، وابتدا يتعرف إنه اسمه فلان.. تاني يوم تلاقية واقف وعربية آخر موديل والبنت الحلوة جنبه، وضاع الماتش وضاع الزمالك..

وأنا أشطبه تاني يوم.. الكلام ده كان زمان شوفي.. هم سامعيني اللاعب اللي إنت بتقولي عليه ده أشطبه بعد 24 ساعة..

مهما كانت أهميته؟

لو مارادونا..

حتى لو مدفوع فيه؟

هاخد فلوسي منه.. ماعنديش مشكلة باعرف آخد فلوسي.. شوفي أنا اجتمعت بيهم وقلت لهم: حكم هتشوّح له 20 ألف جنيه هاخصمهم منك.. الحكم ده زي أبوك بالضبط.. حكم ظلمك سيبهولي.. أنا بقى هاعرف أتصرف معاه.. هيعمل لي إيه؟ عندي 50 قناة أقدر أتصرف مع هذا الحكم.. المدرب بتاعك يغيرك.. الفريق المنافس.. هتضرب واحد فيه.. هتشتمه.. جمهور المنافس.. جمهورك.. كل ده له عقوبات مشددة.. إنت لاعب في الملعب.. إنت جون تقف تشوف الأجوان.. إنت دفاع تدافع عن الجون بتاعك.. إنت راجل مهاجم تجيب إجوان.. كل واحد ليه دور.. لكن حضرتك هتبقى حكم ولاعب ورئيس اتحاد الكرة الكلام ده مش هيحصل..

دي الحاجة الأولى.. الحاجة الثانية: أنا مش عايزه يفوز عايز يبقى عنده إرادة النصر.. المكسب والخسارة توفيق من ربنا على فكرة.. ابذل الـ90 دقيقة جهدك.. قلت له أنا راجل ماكسبش "كمال درويش" لسبب بسيط جدا.. ده راجل قعد 10 سنين في رئاسة النادي لكن عشان عندي إرادة النصر.. ماكسبش "إسماعيل سليم" لأنه كان قاعد 8 سنين نائب رئيس النادي بإرادة النصر هتكسب.. ابذل المجهود الـ90 دقيقة، والتوفيق من عند ربنا.. اللي إنت بتقولي عليه ده لو ظبطت لاعب أو سمعت عن لاعب.......

ماهو حضرتك ظبطت.. إرادة النصر تيجي منين، وأنا على علاقة بممثلة شابة، والممثلة تقول في الجرايد تقول قصائد، وحضرتك نصحته إنه يتزوج من الممثلة الشابة دي بدون ذكر أسماء..

لا أنا مابانصحش حد يتجوز وماليش دعوة بالممثلين الشباب..

ضد الجواز

لا... مليش دعوة.. هو لو راح اتجوز "فيفي عبده" ماليش دعوة، وهو في الملعب.. لو لاقيته مخسّع هاحاسبه.. عارفة اللي اللاعب ده في التدريب بقى وحش.. ماكنتش هاقيده.. لكن لما لاقيته ملتزم بيصلي، وفي النهاية عندى مستر "بوكير" بيعمل لي تقييم لكل لعيب، هيقول لي ده يقعد، وده يمشي هاقول له حاضر، واضرب له تعظيم سلام، ولا تدخل لي في عمله خالص..

ولا "فاروق جعفر"؟

"فاروق جعفر" يا جماعة مالوش دعوة بالجهاز.. "فاروق جعفر" على فكرة سافر تونس على حسابه.. جاب "جونيور" اللي هو أحسن لاعب إفريقي دلوقتي، لكن لما احنا جبناه قريت في جرنال قال لك: دي صفقة فاشلة..

الناس بيقولوا الزمالك شربه..

ياعم شربناه وخلاص.. اللاعب الملتزم فوق دماغي..

طيب إبراهيم سعيد؟

ملتزم جداً.. وأنا واخد "إبراهيم" مطرود من النادي الأهلي زي ما بتقولي كليبات وماسك الخرطوم.. وقلت له: لو شفتك ماسك الخرطوم يا "إبراهيم" هتقعد في البيت.. "إبراهيم سعيد" من أحسن اللعيبة في مصر زي "حازم إمام" بالضبط..

طيب إيه الحالة اللي بتيجي ليهم دي إيه.. حالة الستات والخروج دي؟

زي الحالة اللي بتجيلي وأنا قاعد وفاضل دقيقتين ع الماتش يخلص.. رحت قايم شاتم الحكم.. حالة بتيجي لكل الزملكاوية يمكن فيه حاجة في المية عندنا.. تخيلي احنا قاعدين بنعمل حوار ورحت قايم مكسر الكوبايات...

لا أنا بشوف في الشارع بس أنا بشوفهم بعنيّ.. ليه اللاعب المصري مابيفهمش نجوميته؟

الاحتراف غلط برضه.. دي قضية تانية خالص.. احنا فاهمين الاحتراف غلط.. "محمود الجوهري" لما عمل الاحتراف في مصر ماعملش قواعد وأسس.. عمل الاحتراف علشان الولاد دخلوا معاه كاس العالم.. بيرد لهم الجميل.. رد الجميل غلط فأصبح الاحتراف هو الانحراف..

العلاقة مع الأهلي صراعات.. حضرتك انتظرت منه اعتذار على حاجات.. صراع اللعيبة "عنتر ولبلب" زي ما بيتكتب في الجرائد.. إيه الموقف مع الأهلي؟

شوف أنا عايز أقول لك حاجة.. مجلس إدارة النادي الأهلي ده مجلس محترم جداً بيدير قلعة محترمة جداً.. جماهيره محترمة جداً.. لكن كون عنده موظف بيسيء للنادي الأهلي.. أنا مش هارد عليه هاخلي موظف عندي يرد عليه.. هو اللى بيسيء للنادي الأهلي.. على فكرة لو فيه حد قدم شكوى في النادي الأهلي للاتحاد الدولي هيبقى فيه عقوبة.. "سماكة" ده متعاقد مع مين؟

الترسانة، وبعدين الزمالك..

سيبك من الزمالك..

الترسانة

ينفع إنك تعمل معاه عقد وهو مع الترسانة، من غير استغناء وتخبيه في بلد من البلاد.. ده النادي الأهلي؟ عمر ما كان ده النادي الأهلي.. ينفع "محمد عبد الله" لسه متعاقد مع الإسماعيلي لغاية دلوقتي وتاخده تخبيه أو تقول له: لا.. ماتمضيش العقد بتاعك الجديد مع الإسماعيلي.. ينفع الكلام ده؟.. ماعتقدتش إن "حسن حمدي" و"الخطيب"، والناس دول كلهم محترمين على فكرة.. "محمد عبد الوهاب" أنا محاميه، و"محمود الخطيب" لما بيبقى عنده مشكلة بيجيلي نادي الزمالك.. أصدقائي وكلهم ناس محترمين.. كون فيه موظف بيعمل أي حاجة علشان ياخد عمولة وسمسرة بيسيء للنادي الأهلي.. النادي الأهلي يحاسبه، ومش هارد عليه عندى موظفين قده يردوا عليه..

طيب إيه اللي يمنع إنك تقعد مع الناس اللي حضرتك قلت عليهم، واتكلمت معاهم، ويتعمل إطار؟

أنا عندي "محمد عبد الوهاب" كل يوم في المكتب على فكرة، وكان معانا "خالد مرتجي" و"هشام سعيد".. أنا معنديش مشكلة.. لكن مين اللي يروح لمين؟ يعني أنا راجل نجحت في الانتخابات وقيل إن "حسن حمدي" بيساند "كمال درويش".. هل "حسن حمدي" رفع سماعة التليفون وقال للقلعة اللي زيه: مبروك.. ماحصلش..

محصلش تهنئة؟

هل هو جالي وقال لي: مبروك.. ماحصلش.. يعني أنا راجل ناجح.. أروح واخد نفسي وأروح للنادي الأهلي، وأقول له يا كابتن "حسن" أنا بقى والنبي "عبده كفتة" والنبي تعالَ بارك لي.. مش هيحصل لأن أنا زيه مش هأقول أحسن منه.. لا أنا زيه على الأقل.. هو المفروض ييجي لي، وأنا مستنيه ومنتظره، ومادد إيدي ليه علشان نتفق على حاجات كثيرة منها إن اللعيبة ماتتاجرش بينا.. اللعيبة ماتلعبش بينا.. وأنا يا كابتن "حسن" عندي نص لعيبتك جولي في ملعبي، وبيتي ورفضت اتعاقد معاهم..

أنا عايز أقول كلمة في النهاية: الواحد مش باللبس.. بثقافته وبسلوكه وعلاقاته وابتداء من البر بأهله.. يا جماعة ده شيء مهم جداً.. علاقته بأساتذته سواء في الجامعة أو المدرسة.. صداقته بزميله أو بزميلته.. حفاظه على نفسه.. حفاظه على وطنه.. على فكرة أنا باشوف اليومين دول مظاهرات كثيرة جداً بتطلع تشتم البلد.. أنا كنت باطلع مظاهرات كثيرة جداً.. عمري ما شتمت مصر ولا رئيس مصر لأن ده هو رمز لمصر.. اللي بتقروه وبتشوفوه في الفضائيات عن مصر.. دي ناس قابضة من أمريكا سواء ابن خالدون أو أم خلدون أو خلدون نفسه.. بني آدمين مايهمهمش غير الأخضر اللي هو الدولار.. بلدنا جميلة جداً.. شبابنا محترم جدا.. هو ده الشباب اللي طلع منه "أحمد زويل"، و"نجيب محفوظ"، والناس اللى كسرت إسرائيل في 73.. هو ده الشباب المحترم الواعي وأتمنى إني أكون وصلت رسالة ليكم ولإخواتي الصغيرين اللي بيشفونا دلوقتي...

شكراً جزيلاً..