طيب والقصة بتاعة كرة اليد ليه اختصمت النادي الأهلي فيها؟

برضه ده غلط.. أنا رفعتها على وزير الشباب بصفته لأنه المفروض هينفذ القرار الإدارى وعلى اتحاد اليد.. المحكمة هي التي أمرت باختصام النادي الأهلي، وليس أنا.. ده قرار محكمة لأنه قال إن النادي الأهلي كان طرف في المباراة وحصل على الكأس طبعاً أنا عمال أقرأ الكلام ده في الجرائد.. هم بيقولوا إن في حد اسمه "أكثم" ماعرفش بيشتغل إيه.. لو مستشار ممنوع يشتغل في الأندية بالطريقة اللي بيشتغلها دي، لو هو محامي عايز أقول له أنا عندي 80 محامي زيك.. أنا عايز أقول له لو رحت المحكمة واطلعت على المحضر كنت لاقيت إن هذا الاختصام ده من المحكمة، وليس مني.. إنت قلت حتة مهمة جداً قلت إن مجلس إدارة النادي الأهلي لما سئلوا قالوا إن "مرتضى منصور" لم يرتكب أي خطأ بالعكس قالوا هو اللي كان بيهدي الجماهير، وقال كده "حسن المستكاوي" في مقال كبير لكن هو "حسن" (يقصد حسن مصطفى) عامل نفسه فرعون عايز أقول له بلاش أنا يا "حسن".. بلاش أنا خالص..

طيب الخلاف مع الاأهرام.. هل المقاطعة أسلوب صحيح؟.. تقاطع مؤسسة زي الأهرام بكل تاريخها.

ماينفعش "عصام عبد المنعم" الجول الفاشل بتاع النادي الأهلي كل يوم سبت يكتب: ده "مرتضى منصور" بقى فقرة كوميدية في الفضائيات فأنا رديت، وقلت أحسن ما أبقى فقرة جنسية.. على الأقل دمي خفيف يا أخي، وماعنديش "عهدي أيوب" خلاص.. واسألوا النادي الأهلي عن قصة "عهدي أيوب"..

اللي هيغلط في نادى الزمالك من أول البواب لحد رئيس النادي لن يسمح ليه بالكلام ده.. أنا راجل دوري أحافظ على كرامة النادي.. اللائحة بتقول كده، فابتدى يشتم.. عندهم واحد كان رئيس مجلة النادي كان بياخد 10 آلاف جنيه في الشهر.. كان كل دوره يقول "مرتضى" دخل الحمام.. "مرتضى" حلق.. غطي أنشطة نادي الزمالك يا أستاذ.. إنت مالك بي؟.. ماحدش يقدر يكتب حاجة عن "حسن حمدي"..

إيه الفرق يعني؟

لأن "حسن حمدي" رئيس وكالة الإعلان، ووكالة الاعلان جزء من مؤسسة الأهرام وده اللي عامل الحساسية. هاديك مثال.. "سماكة" قبل ما آخده كان بيقولوا ده أعظم لاعب في العالم دخلت الصفقة وأخدته قال لك ده لاعب بنكلة لما أخدته.. طلعت من الصفقة قلت يا جماعة ده ولد أهله ماربهوش..

كتب كده في جواب ولا يشرفني إن يلبس فانلة الزمالك.. ماضي لي "سماكة" ده وكاتب ورقة إن عشقه الأول والأخير الزمالك.. مش ممكن هابقى راجل محترم، وأمسك ميكروفون، وعربية كارو، وأمشي في الحواري، وأقول يا جماعة شوفوا لي "سماكة" فين ده أنا أبقى راجل أهبل.. يقول لك اختفى فين في شرم.. لا في الغردقة.. خليه مختفي.. بعد كده قالوا أصله لقى ثغرة في العقد، ولقى إنه مش هيعرف ياخده فسابه.. كل ده أهرام.. أنا مش عاجب.. الولد خدته يقول لك ده بيهدر مال عام، ومفيش أخلاق وقيم بيتخانقوا مع بعض.. سبناه يقول لك ده لقى ثغرة ومش قادر يخده.. أن باديك نموذج.. "أكوتي" كان بمليون جنيه دخلنا في الصفقة وصلت 11 مليون جنيه –على مسئوليتي- المصري خد 3.5 مليون والنادي الغاني خد نصهم 1.750 و 2 لعيبة بمليون ونص والولد خد 4 مليون.. آدى 11.5 مليون.. مفيش حرف اتكتب عن إهدار مال العام.

بس الزمالك بعت جواب.....

شوف.. هذا الجواب واتنشر في الاهرام.. أنا عايز الأستاذ اللي نشره لما يروح للنائب العام، ويتحبس 4 أيام لأنه زور.. لا أنا بعت الفاكس، ولا موقع على الفاكس، ولا لي علاقة بالفاكس.. أنا عامل جواب للنائب العام.. والأستاذ يروح للنائب العام يحكي له الفاكس ده جاي منين، ومين ضحك عليه.. أنا باقول تاني على مسئوليتي لا بعتّه لا أنا ولا النادي بتاعى ولا طالع من عندنا ويشوفوا مين اللي بعته.. أنا على فكرة عملت بلاغ للنائب العام بأدب.. هو ده الحوار المحترم.. إنت نشرت حاجة منسوبة لي.. النائب العام يجيبني يستكتبني.. هيشوف رقم الفاكس رقم الزمالك ولا لأ.. إذا طلع الكلام ده كذب هاخد من الأهرام مش أقل من مليار تعويض أديهم للزمالك.