النهاردة في جريدة نازلة اسمها جريدة الفرسان كتب فيها الناقد الرياضي أسامة خليل" كلمة جميلة جدا.. ومتفق معك في معركتك ضد الفساد.. وقال "أسامة" إن "حازم إمام" كابتن نادى الزمالك حاسس بإحباط لأن الصفقات ماكانتش على المستوى المطلوب.. إيه رأيك؟

أولا "حازم امام" لا يجرؤ أن يقول الكلام ده في جرنال.. وهو سامعني وشايفني.. "حازم إمام" عارف إن فيه رئيس نادي محترم.. وجهاز فني محترم.. ومش "حازم" اللي هيختار اللعيبة؟!! "حازم" لاعب في منظومة كبيرة و"حازم إمام" مايقولش الكلام ده لأنه متربي وعارف كويس قوي يعني إيه رئيس نادي اسمه "مرتضى منصور".. بس ممكن يقول بصفته الكابتن إن له مستحقات هو واللعيبة.. وعملنا اجتماع من أسبوعين وصرفت مستحقاتهم بالكامل.. إنما أنا ممكن أجيب "علي قوطة" يلعب جنب "حازم إمام"، و"حازم إمام" مايتكلمشي.. لأنه مالوش دعوة.. مع احترامي لـ"حازم إمام"..

أما بالنسبة لمرجوعنا عن "حسن مصطفى" فأنا عايز أقول حاجة مهمة.. أنا قلت قبل كده في كذا برنامج إن قدوتي في رؤساء الأندية "حسن حلمي" و"نور الدالي" و"صالح سليم".. ولما رئيس نادى الزمالك يقول إن القدوة بتاعته "صالح سليم" يبقى محترم.. يعني ماعندوش أي ضغينة للنادي الأهلي على الرغم من إن ده ممكن يزعل كتير من الزمالكاوية.. ولكن فعلا "صالح سليم" رجل شريف عفيف محترم ومعتز بنفسه.. وعمل للنادي بتاعه قيمة.. أما عن المباراة فهي كانت آخر مباراة في دوري كرة اليد.. ولو الزمالك تعادل يفوز بالبطولة.. فأنا رحت وحضرت المباراة لسببين.. أولهما إن كرة اليد من أنصار "كمال درويش".. وأنا عايز أقول انه ماعنديش تصفية حسابات كلهم ولادي.. ودي كانت أول بطولة في عهدي.. ثانيا إن الناس بيقولوا إننا بنروح مباريات الكرة وسايبين الرياضات التانية زي اليد والسلة وغيرها.. بس أنا عايز أقول إن كل الرياضات عندي واحد.. وكان مجلس إدارة الأهلي موجود، منهم الأخ "خالد مرتجي" وأستاذ "هشام سعيد" و"محرم الراغب" و"سمير عبد ربه" موجودين وقعدين جنبي.. ومعايا من مجلس إدارة الزمالك المستشار "محمود عبد الله" والأخ "كريم حسن شحاتة".. من بداية المباراة أمي وأم "كريم" بتتشتم .. بس في كرة اليد فيه قانون بيقول إنه لما يبقى فيه سباب.. يدوا إنذار وطرد.. بس الحكم مالوش دعوة.. أما عن أمي فهي ست طيبة والله يرحمها.. فاتشتمت طول المباراة بس مش مشكلة.. أما جمهور الزمالك عايز يرد.. رحت وقفت وقلت ليهم " لا.. شجع فريقك وفنلتك".. فقام الأخ "محرم الراغب" و"هشام سعيد" عملوا نفس الموقف مع جماهير الأهلي.. بس كنت أنا اللي بدأت الأول..

تعالوا بقى نشوف التقرير قال إيه.. في الدقيقة 28 كان فاضل دقيقتين.. والزمالك كان متفوق بخمس أهداف عن الأهلي.. يعني عشان الأهلي يعوضهم في الوقت ده حاجة مستحيلة جدا.. التقرير هنا بيقول إنه جالي حالة غريبة.. قمت شاتم الحكم ورئيس الاتحاد والاتحاد.. وابتديت أرقص!!!!!! (يضحك) طبعاً الراجل اللي قال كده ده راجل مجنون.. يعني أنا.. أنا رئيس محكمة وعضو مجلس شعب ورئيس أكبر نادي في مصر.. هو أنا وفريقي فاضل دقيقتين وياخد البطولة اللي هي أول بطولة ليّ مع النادي فأقوم وأشتم الحكم... طبعاً الكلام ده كله كدب.. وأعضاء مجلس إدارة الأهلي قالوا ان ده ماحصلش.. والدليل إنه كذاب هاقولك حاجة.. لنفترض إني شتمت الحكم وشتمت "حسن مصطفى".. ماشي.. طيب ليه تدعوني إني أسلم معاك الدرع في الملعب.. مع العلم إني راجل قليل الأدب ومنفلت وجاتلي الحالة العصبية وعمال أكسر في الدنيا وباقول "هاتولي حسن مصطفى"!!!!..

طبعا الراجل اللي قال كده ده عبيط قوي.. على مسئوليتي صدقني.. نزلت أنا الملعب وقلت لي اتفضل يا أستاذ "مرتضى" معانا تسلم الدرع.. وسلمت الدرع لأولادنا.. ودورت على "عاصم السعدنى - المدير الفني للأهلي" وسلمت عليه مع لعيبة النادي الأهلي كلها واحد واحد.. ومشيت.. فين بقى إني شتمت الحكم؟!!

إنت عارف إن في الصالة المغطاة ده بيني وبين الحكم فيها حوالي 20 دور!!!

القصة الحقيقة بقى.. هي إنه بعد المتش ما خلص.. إن الأخ "حسين فتحى - نائب رئيس الاتحاد" ومستشار وزير الشباب السابق... الأخ "كمال درويش" والأخ "إسماعيل" كانوا شطبوني (من عضوية النادي) كذا مرة.. فكنت آخد أحكام وارجع (للنادي)... وهو يرفض ينفذها لأنه صاحب "كمال درويش".. فتصور إن هو بالموقف اللي هو عمله ده يبقى راجل هيهز شعرة من راسي.. وأنا حذرته وباحذره تاني وباقول له يا حسن يا مصطفى.. أنا هديت علشان المسئولين في الدولة قالوا لي اهدى.. بس خلاص مش هاهدا تاني.. والملفات طلعت تاني يا "حسن".. إنت و"حسين فتحي".. خلصنا المباراة...

فيه جراج حاطط فيه عربيته وأنا حاطط عربيتي جنبها.. ولقيته بيقولي "عاجبك اللي فلان الفلاني بيعمله وكذا وكذا" بألفاظ لا تليق... اللي بيتكلم عليه ده هو وزير الشباب الحالي... اللي هو مشاه.. فقلت له إنت بتتكلم عن مين؟.. فقال لي أنا باتكلم عن فلان.. فقلت له إنت ترضى إني أتكلم عليك أو "حسن مصطفى" بالطريقة ده؟!! فقال لي إنت بتقارن "حسن مصطفى" بـ"ممدوح البلتاجي"؟!! فقلت له... لا بصراحة مفيش وجه مقارنة.. "ممدوح البلتاجي" كان راجل محامي عام وراجل محترم... ده اللي أنا قلته في الجراج...

دلوقتي بقى ايه علاقة ده بالمباراة؟!! افرض إنه قال لي زرارك ده مضايقني وأنا قلت له كرافتتك دي زي كرافتة "يونس شلبي" مثلاً، وقامت خناقة بينّا نقوم نقول الزمالك مايلعبش!!! دي ناس عندهم حالة من التخلف... المهم فوجئت بجواب جالي من واحدة اسمها "آمال" بتقول: "ممنوع -أنا- رئيس نادى الزمالك أدخل المباراة بتاعة الكأس اللي نادي الزمالك هيلعب فيها"!!

المهم... ولا بوش يجرؤ إنه يمنع "مرتضى منصور" يدخل أي مكان في الدنيا.. ولا يجرؤ!! فأنا أخدت الجواب.... جواب فيه قلة أدب وقلة ذوق وجليطة... إنت بتخاطبيني أنا اللى بامثل 40 مليون مصري.. وكل العالم العربي وإفريقيا كلهم زمالكاوية؟!! وتقولي لي ممنوع أدخل مباراة... لا يا "حسن مصطفى".. أنا مش شغال عندك... أنا عايز أقول لك حاجة يا "حسن"... أنا "مرتضى منصور" لما تيجى تتكلم معايا تتكلم بأدب ولما تخاطبني.. تبقى تخاطبني بأدب..

بس أنا هروح طبعاً المباراة.. ولو مارحتش يبقى أقدم استقالتي وأمشي... طبعا اتعرض الموقف على وزير الشباب وقلت له: "الفيصل بيني وبين الراجل ده تقرير الحكم"!! تقرير الحكم بيقول إن "مرتضى" لم يرتكب أي خطأ.. اللايحة بتاعته بتعاقب الإداري اللي بيشتغل عندى بـ200 جنيه في الشهر.. اللى بياخد أسماء العيال اللي هيغيرها.. بيعاقبه ليه؟؟ لأن ده جزء من التشكيل.. إنما هتعاقب رئيس نادي الزمالك إنت مين إنت أصلاً؟!! نفترض في لعبة اسمها لعبة الديك والكتكوت مثلاً أو الفرخة والكتكوت رئيس اتحاد الفرخة والكتكوت يقول مش عاجبني "مرتضى" مايدخلش المباراة، ويقوم رئيس لعبة النملة يقول "حسن حمدي" مايدخلش برضه!!!
طبعا ده تهريج... أول ما رحت المباراة.. فجأة الحكم الغريب ده.. قام بإجراء تليفون في الموبايل بيقول فيه: "أيوه يا باشا.. وصل يافندم... خلاص هنلغي"!!

بالذمة فيه قانون دولة يسمح بالتهريج ده؟!! بالذمة ده رئيس اتحاد دولي؟!!

طبعا ممكن يكون بيتكلم مع "أبلة فضيلة"!!!

فاللي عمله "حسن مصطفى" ده تهريج.. فيقوم الحكم بإلغاء المباراة.. طبعا كانت هتحصل كارثة أمنية واعتبروا الأهلي الفائز وأخذ الكأس...

أنا ماعنديش مانع إن الأهلي ياخد الكاس.. لأنه بطل.. يعني مش فريق مغمور جاي ياخد الكاس.. فمن الأوضاع الطبيعية إن الأهلي أو الزمالك هم اللي ياخدوا الكاس.. والرياضة يا مكسب يا خسارة.. إنما بالموبايل يلغي مباراة؟!!.. والوضع الطبيعي إن جمهور الزمالك حاسس بالظلم.. ولقيت قناة الجزيرة تقول: "مرتضى منصور اقتحم الملعب بـ 20 مسلح وقد استولى على الكأس"!! كأس إيه اللي استوليت عليه؟

ده أنا شاريه بـ 400 جنيه من العباسية!!.. وعارف.. لما عملت كده الجمهور هدي.. وبكده حافظت على أمن 10 آلاف مشاهد وامتصيت غضب الجمهور.. إنت بقى يا حسن يا مصطفي لم تحافظ على الأمن.. ولو إنت شايف وجودي غلط.. كان الحكم كمل المباراة وكتب كده في تقريره.. وبعد كده الغي.. إنما تقول وسط الجمهور الغفير للزمالك إنك لغيت والأهلي هو الفائز علشان رئيس النادي حضر المباراة... وكانت الجماهير كانت هتنزل تقتحم الملعب.. ثم أنا نزلت بعد ما الحكام جريوا والملعب فاضي... أنا هاقول لك بيعمل إيه دلوقتي.. بيجيب الحكام يقول ليهم اكتبوا لي مش هتحكموا للزمالك.. أنا هاجيب جمعية عمومية تشطب الزمالك.. أنا باتحداك لأنك لو عملت حاجة زي كده هاعمل الآتي: هاشيلك من الاتحاد الدولي.. أنا باقول أهو وإنت شايفني..

أنا عندي 14 ولد في فريق الزمالك في المنتخب القومي لكرة اليد و8 في الناشئين إنت أخدتهم ورحت للبرتغال وأنا قلت للسيد الوزير مش هامشيهم قال لي خليك إنت الكبير.. ده حقي.. أنا متعاقد معاهم، وإنت بتقول هتجمد فريقهم، ما هم دول اللي إنت هتجمدهم.. أنا باديك تحذير وإنذار لو ما رجعتش عن الكلام اللي في دماغك ده ما عنديش ولد هيلعب في المنتخب تاني، ويبقى إنت اللي بدأت لأن أنا باحافظ على مصر واسم مصر وسمعة مصر، وإنت عمال تبهدل نادي بطل.. معروف في العالم كله الزمالك أكتر منك.. ويا "حسن" للمرة الأخيرة ماتخلينيش أفتح بقية الملفات وأقول.. ولا بلاش دلوقتي...