أنا عايز أعرف مع الصراعات دي كلها.. إنت عايش ازاي؟؟
عايش.. مستمتع بحياتي.

يعني لما حد فينا بيتكتب عليه كلمة في جرنال ولا عربيته وقفت في الشارع بيتعكنن طول اليوم ويبقى مش عايز يكلم مراته..
(ضحك)

حضرتك عايش ازاي بكم الصراعات والقضايا ده؟ بتنام عادي؟

بنام عادي جدا هو أنا حرامي، ولاّ مرتشي زي "الأفندي" لأ!!! ده أنا بنام مستريح قوي لأن تاريخي في القضاء مشرف مفيش ولا شكوى، تاريخي في المحاماة مشرف مفيش ولا شكوى، تاريخي في مجلس الشعب تعالي شوفي أنا عامل في دايرتي إيه، بعمل مشروعات بملايين من جيبي ومن الدولة..

أكيد بتتضايق لما حد يشتم فيك..

ولا بيهز شعرة من رأسي..
أقول لك ليه.. ماهو ده وضع طبيعي، الفساد له أنياب الفاسدين وله مريدين.. الفاسد ده أتفه واحد تتعاملي معاه أما المريدين اللي حواليه هم اللي شغالين، ليه؟ بيستفيدوا.. الراجل ده بيستفيد منه بحاجة بدءا من سندويتش، ممكن يجيب له سندويتش يغديه.. ممكن يجيب له عربية، حسب ما بيدي له..

أنا راجل عندي قضية وعندي مبدأ من أيام ما كنت طالب في أولى ثانوي كنت رئيس جماعة الصحافة على مستوى كل مدارس الثانوية، وعملت مجلة وزير التعليم هو اللي كان بيعملها، وأنا كنت رئيس تحريرها وانتقدت وزير التربية والتعليم، ودوني النيابة وفصلوني أيامها، ورجعت والوزير هو اللي مشي.. أنا مابخافش! في الجامعة كنت رئيس النادي السياسي ورئيس جماعة الصحافة، وانتقدت كل نظام الحكم في الوقت ده في مجلة كنت باعملها واتحبست.. قعدت شهر في سجن القناطر للرجال.. أنا ماباخافش!!!!

طيب وحضرتك طفل صغير كنت بتقول حاضر وطيب لبابا وماما وكده؟
مفيش بابا وماما فيه أبويا وأمي.. أنا أعرف أقول بابا؟! مابعرفش أقولها..

(ضحك)

كان الطفل مرتضى منصور طفل مطيع ويتزعق له؟
لا، حد يقدر يزعق لي؟ أنا محدش يقدر يزعقلي.. وبعدين أنا الولد الوحيد وبرغم كده المفروض الولد الوحيد يكون متدلع.. إنما أهلي علموني كويس وربوني كويس، ويقول لك هو مين قريبه في الدولة؟ أقول لك مين قريبي في الدولة.. نمرة واحد سند ربنا سبحانه وتعالى، أنا باتقي ربنا.. وأنا قاضي كنت متقي ربنا، وأنا محامي، كنت متقي ربنا، وأنا عضو مجلس الشعب كنت باتقي ربنا.. وأنا رئيس نادي الزمالك باتقي ربنا.. واحد اداني 2 مليون جنية هدية لـ"مرتضى منصور" اتبرعت بيهم لنادي الزمالك، واتنشر الكلام ده "رئيس نادي اتحاد جدة".. أنا عايز أقول إن الأب والأم حاجة كبيرة؛ لو أبوك وامك راضيين عنك يبقى ده كنز هيفضل طول العمر، ولو غضبانين عليك لن تكسبي ولو بعد حين.. ولن تكسبي في الدنيا ولا حتى في الآخرة.. وعشان كده ربنا سبحانه وتعالى قال: "ولا تقل لهما أف".. عارفة "أف" معناها إيه؟!! يعنى مجرد التأفف أو الزهق.. عارفة لو كل ولد وبنت عرفوا قيمة الأم والأب -السند في الدنيا وفي الآخرة- ليه؟!! دعواتهم هي اللي هتنجيهم في الآخرة حتى لو ارتكبوا بعض الذنوب.. ومش عيب أبدا أصل أنا كنت رئيس نيابة وببوس إيد أبويا.. إيه المشكلة؟!! يقولوا لك ده راجل بلدي وقديم!! بس لما أبويا مات.. مات راضي عني... وأمي كانت في غيبوبة سنة كاملة في مستشفى مش عارفة إللي حواليها.. وأنا كنت نايم جنبها.. لأنها سند ليّ وحس موجود في الدنيا.. أما دلوقتي بنشوف مامي وبابي.. والأسماء اللي بنشوفها دلوقتي.. ومعرفش إذا كانوا غيروا الأسماء ولا إيه؟!!