إيه حكاية إن الناس خايفة منك؟ أنا قبل الحلقة 20 تليفون.. هي الحلقة مع "مرتضى منصور"؟ خلّي بالك ده بيهزأ عى الهواء!! فأنا باسأل حضرتك..إيه سمعة إن "مرتضى منصور" يعني بلطجة، يعني خوف، يعني قضية تترفع من أول كلمة، هجوم ومقالات منشورة في الصحف الصفراء.. على الرغم من إن الشخصية الموجودة قدامي بتتكلم غير كده..

هى دي شخصيتي الطبيعية.. كون بعض الأقلام الهايفة التافهة اللي بيقولوا عليها صحف صفراء.. لا أنا باقول إن عمر ما يكون فيه صحف صفراء دي بيكون اسمها نشرة قذرة صفراء! الصحافة طول عمرها محترمة والصحفي طول عمره محترم.. عمرك ما هتلاقي صحفي صحفي "يقل أدبه" على حد.. ده هتلاقيه مأجور.. عامل أوضة كده تحت السلم عمال يطلع نشرة.. مرة تطلع صفراء.. مرة تطلع خضراء.. حسب ما تطلع في إيده.. مرة يطلعك السما مرة ينزلك الأرض..

طيب المأجور اللي يشتمني ده وأنا عارف ومتأكد إنه مأجور أعمل إيه ضده؟ فين القانون اللي أنا أقول اتكتب كذا عني.. و آخد حقي ازاي؟

لا أنا بعرف اخد حقى كويس...
أي دولة في الدنيا فيها وزير خارجية، وزير إعلام ووزير حربية.. أنا "مؤسسة" أنا كـ"مرتضى منصور": "مؤسسة"، عندي في مؤسستي وزير خارجية وعندي وزير حربية وعندي وزير داخلية ووزير إعلام.. فيه الإنسان المؤدب المحترم وزير الخارجية اللي عندي يتكلم معاه، والإنسان قليل الأدب البلطجي عندي برضه اللي يتصرف معاه، إيه المشكلة يعني..

ماهو احنا في مجتمع حق من غير قوة يبقى خنوع و ذل ومهانة.. قوة من غير حق دي بلطجة!!