مرتضى منصور" في حوار ساخن جدا!!

حوار النهاردة هيبقى مختلف..
معانا ضيف مختلف عن أي ضيف ممكن نكون استضفناه أو ضيوف كتيرة ممكن تيجي بعد كده..
هو قائد ثورة تعتبر ثورة حقيقة مش بس في أكبر قلعة من القلاع الرياضية في العالم العربي وإفريقيا والشرق الأوسط بل في المجتمع كله..
فيه ناس كتير معاه وناس كتير بتعارضه..
ملاك أم شيطان؟ هل هو قائدة ثورة؟

أقاويل كثيرة جداً في خلال مدة طويلة أعتقد هتستمر الصورة دي لحد ما نشوف نتيجة حاسمة..

معانا النهاردة المستشار "مرتضى منصور"، رئيس نادي الزمالك..

أهلا بحضرتك
اهلاً بيك

"مرتضى منصور" جاءت له فرصة لا تسنح للكثيرين، وهي إنك نجحت بأغلبية قوية في نادي الزمالك بمد شعبي جامد، حكماء الزمالك والشعب العادي من مشجعي الزمالك كله واقف وراك بشكل قوي جداً، الناس بتنتظر منك إنك تسن القواعد الصحيحة، إن مايكونش فيه أي نوع من أنواع التجاوزات والخلافات أو .. أو .. أو، الحقيقة بتقول أو الصورة اللي قدامنا بتقول: زمن قليل جداً فيه صراعات مع جهات كثيرة جداً.. اتحاد الكرة المصري، النادي الأهلي، اتحاد كرة اليد، ومتوقع يترفع قضايا على النادي.. احتجاجات، مشاكل.. هل دي الصورة اللي في بالك..؟؟

عمرك سمعت عن حد بيتخانق مع واحد ميت؟

لا

دائماً الخناقة بتبقى مع الصاحي.. مع الحي..مع الشغال.. وأنا شغال باقضي على الفساد فالمفسدين بيحاربوني، باقضي على الظلم فهتلاقي "حسن مصطفي" قامت له حالة!!

أنا باقول إن الأهلي مش أحسن من الزمالك الاثنين قلعتين.. الأهلي من 1907 والزمالك من 1911.. الأهلي أجيال كبيرة جداً بدءا من "مختار التتش"، و"عبده صالح الوحش"، و"الجوهري"، و"صالح سليم"، و"طارق سليم"، "رفعت الفناجيلي"، "الشيخ طه"، "ريعو"، "الخطيب".. شوف أنا حافظهم ازاي لأنهم سطروا في التاريخ أسماءهم لأن دول كانوا نجوم منتخبات زي الزمالك: "حنفي بسطان"، و"عصام بهيج"، و"شريف الفار"، و"حمادة إمام"، و"نبيل نصير"، و"أحمد رفعت"، و"سمير قطب"... أجيال برضه.. وأنا حافظهم ليه برضه؟ لأن الناس دول كانوا نجوم منتخبات، وكانت العلاقة بين الأهلي والزمالك علاقة محترمة جداً..

أنا أول مرة أشوف النهاردة الأهلي بيلاعب مثلا، ولاّ بلاش الأهلي، الزمالك بيلاعب مثلا الترسانة يقوم جمهور الزمالك يسيب الترسانة ويقعد يشتم في الأهلي!! الأهلي بيلاعب الإسماعيلي فالجمهور يسيب الإسماعيلي ويشتم في الزمالك.. دي موضة أنا آسف فيها "قلة أدب" ودي ناس عندها "عقد نفسية و أمراض نفسية" ويقول لك بخمسة جنيه أروح أشتم التخين!!

ده طبعا مرض نفسي عنده وهو مش عارف يعمل إيه.. هو لو شتم أمين شرطة في الشارع هيقوم مديله قلم وحابسه ومايروحش بيتهم، لكن يروح بخمسة جنيه يشتم الكبير والصغير، هو مش رايح يتفرج، هو رايح يشتم!!
دي حالة مرضية على فكرة...

النهاردة أنا عندي بعض المشاكل أنا دخلت نادي.. على فكرة الناس مش مختلفة علي قوى.. ليه بقى؟ لأن دي رابع دورة لي كعضو مجلس إدارة في الزمالك: 2 عضو، 1 نائب، 1رئيس.. لو الناس مش عايزاني يعنى أول مرة يخافوا مني، تاني مرة خافوا شوية، ثالث مرة يسقطوني، إنما أربع مرات. ده اكتساح!!