مافيا

طبعا كلكم شوفتم الفيلم، وأكيد عجبكم، والفيلم بتاعنا النهاردة بيتكلم عن مافيا برضه بس مش بطولة "أحمد السقا ومنى زكي.." لأ ده بقى من بطولة "المعلم شفتورة" وتشاركه البطولة "المعلمة تحية المفترية" وشكر خاص جدا لنقابة (مافيا) الجزارين المجهول مكانها حتى الآن، طبعا عرفتم الفيلم عن إيه، بصراحة هو فيلم بايخ شوية لأن احنا، المخرج والمتفرجين برضه، هتقولوا ازاي؟؟ هاقول لكم..

كلنا عارفين وشايفين أسعار اللحمة عمالة تطلع ازأي لحد ما وصلت للدور 35، وللأسف ماحدش عارف يعمل حاجة، برضه بنشتري هتقول لي طب نعمل إيه ماناكلش لحمة يعني؟ هاقول لكم وماله، إيه يعني لو قعدنا شهر مثلا ماحدش يشتري لحمة خالص، ولا ناكلها، إيه هنموت؟!!

ولو يا سيدي الفلوس قرصاك قوي بتوع اللحمة (ميزانية خاصة) هات بهم أكل لحد مش لاقي يشتري سندويتش فول، حتى يبقى ضربنا عصفورين بحجر، لأن المشكلة إن الأسعار من قبل العيد اللي فات وهي في الطالع ولما جه العيد زودوها مرة واحدة 5 جنيه، ومازالت في الطالع كل كام يوم شويه بحجة الدولار اللى سعره أصلا نزل، وشوية ضرائب وشوية هو كده، فردة دراع، واحنا بنتفرج، بصراحة هم لهم حق، ضربوا ضربة صغيرة مالاقوش حد رد فساقوا فيها "سكتنا له دخل بحماره" زي أمريكا وإسرائيل كده عارفين إن مفيش حد هيعمل حاجة، فبيعملوا اللي هم عاوزينه وكبيرنا نحتج ونشجب وبس، يعني شوية كلام في الهوا، هتقولوا لي طب ياعم إيه جاب ده لده دلوقتي!! إيه معقولة مش واخدين بالكم من العامل المشترك؟!!!

السلبية لازم نتخلص منها بقى ونتحرر وهي هتبتدي بالحاجات الداخلية أولا، وبعد كده نخش على بره كفاية كدة نوم بقى يا جماعة يلا نصحى مازهقتوش من النوم؟.

طب إيه الحل؟؟
الحل بسيط جدا كلنا نتفق على شهر معين هنقاطع فيه شراء اللحمة في كل الجمهورية، وهنشوف إيه اللي هيحصل، وصدقوني هو أسبوع واحد والأسعار هتنزل، وحتى هنفترض (افتراض سلبي) إن ماحصلش حاجة هنموت يعني؟ ولا هيجرى لنا إيه؟؟؟

ومازال الفيلم مستمرا حتى يقرر المخرج -اللي هم المتفرجين- إنهاءه لأن الأبطال نفسهم زهقوا.

ها.. فكروا بقى في الكلام ده كده، وقولوا لي إيه رأيكم، ومستني اقتراحاتكم..