وذلك كل ليلة

وييجي الليل
يطوف القلب في الشارع
ف ليل دامع
ينقط من عينيه الصبر
عنيه مترغرغة وخايف
ما هوش شايف
من الأشباح ولا البنايات دي غير القبر
وحيد في نهاية السكة
ودايماً فاتح الأبواب
مفيش بواب على الدكة
وقافل الباب
ونفسي ارتاح
تقيل الحمل حمل ذنوب
ونفسي ارتاح
تقيل الحمل م المكتوب
ونفسي ارتاح
لكين ازاي وانا أسمع ع اللي بات مغلوب
ونام مرتاح
ومين يرتاح يا طول الليل
ومين يركب على الادهم؟
ومين في السلسلة مسحوب؟
ومين بين البينين زيي
يجرجر خطوته ويجوب
شوارع ناس.... وناس وبيوت
تبص عليك وتمزع بالعيون التوب
وعريَك عن عيون الناس
بمليون رقعة مش محجوب
وتتفسح عيونهم فيك
وتستغرب حفا رجليك
وتوب الفقر فوق كتفك
وعشرين سبحة في رقبتك
وتستغرب على السيف الخشب
في إيديك
وليه خطوك تقيل وكأنه ما بيمشيش؟
وليه فايت ورا ضهرك شوال العيش؟
ترد عينيك ما تسألونيش
..... ماتسألونيش
وتحدف دمعة من عينك
على سيفك
مابيصدّيش.....
ماعادش يصدّي زي زمان
زمان لما حصانك نخ
وهو انطخ.... أما انت
ماحدش هان عليه يدّيك
رصاصة الرحمة حتى الآن
طويل يا ليل ومش عارف
مصيري وآخرة الجريان
ومش شايف سوى قبري
وحيد ف نهاية السكة
وكل مفارق الطرقات ورا ضهري
..مفيش بواب على الدكة
...............ونفسي ارتاح.