جارى التحميل
استخدم زر ESC أو رجوع للعودة
|
حكمت المحكمة
فعليك بالوينجز |
|
| |
|
 محكمتنا محكمة عرفية، مقرها منطقة مخفية، أحكامها غير إلزامية، والمتهم مذنب من غير رفع قضية.
يقال إنه في القريب العاجل سيتم تمرير قانون خاص بالضرائب على الرشاوي حيث ثبت أن دخل العديدين الرسمي أقل كثيرا من أموال "تحت الترابيزة" ولأن حكومتنا حكومة مفتحة فهي لا ترضى بأن تخرج من المولد بلا حمص وربما "بندق وزبيب كمان" ولذلك سيظهر إلى الوجود في القريب العاجل ضريبة الدخل غير المشروع. واليوم يقف أمام محكمتنا كل من سامر القشاط وجاسر علوان، وهما مسئولان حكوميان يتنازعان حول هذا القانون، الأول يساند القانون والآخر يعارضه.
القاضي "للحاجب": استدع طرفي النزاع.
الحاجب: الأستاذ سامر القشاط والأستاذ جاسر علوان.
القاضي: أعتقد أن موضوع محاكمة اليوم غريب شوية، ممكن يا أستاذ سامر توضح موضوع الشكوى؟
سامر القشاط: يا فندم الموضوع بسيط ولصالح الحكومة والشعب "ويزداد صوته حماسا وارتفاعا" واللي يقول غير كده يبقى مخرب وإرهابي مايهمهوش مصلحة البلد...
جاسر علوان "مقاطعا": شايف حضرتك يا فندم أسلوب المصادرة على الرأي الآخر..
القاضي: من فضلك يا أستاذ سامر اعرض موضوعك بشكل موضوعي وبدون مصادرة.
سامر القشاط: يا فندم ضريبة الدخل غير المشروع هتكون سبب في حل مشاكل كتيرة وهي الحل المثالي، وسيادة المسئول اللي فكر فيها شخص عبقري و....
القاضي: من فضلك، أنا قلت عايز رأي موضوعي. ممكن تدخل في الموضوع من غير مجاملات ولا شعارات.
"ويبدو أن سامر القشاط لا يعجبه الكلام ولكنه يتكلم على أية حال"
سامر القشاط: يا فندم خليني أتكلم بصراحة..
القاضي: يا ريت
سامر القشاط "مكملا": دلوقتي الرشاوي شيء موجود وصعب نقاومه...
جاسر علوان "مقاطعا": آه عشان كده هنشجعه!
سامر"متجاهلا جاسر":.. وبعدين يعني خلينا نفتح مخنا شوية. مالها الرشاوي؟ الحكومة مش قادرة تدفع مرتبات تخلي الموظفين يعيشوا زي الناس، طيب فيها إيه لو ساهم المواطنين في دفع فلوس للموظفين دول؟ ده المثل بيقول المليان يكب على الفاضي.
جاسر علوان: إنت مسئول إنت؟! المليان يكب على الفاضي؟! طب واللي يدفع عشان ياخد حق مش حقه ده يبقى شيء عادي؟
سامر القشاط: هي دي النظرة الضيقة اللي احنا عايزين الناس تخلص منها. فيها إيه لما المواطن ياخد حق أخوه المواطن، ما هم كلهم إخوات، ياأخي حب لأخيك ما تحب لنفسك..
جاسر: يا أخي اتكسف على دمك..
القاضي: من فضلكم مش عايز كلام غير لائق..
جاسر: طيب يا أستاذ لو كانت الجوائز عينيه مش مادية هتتصرفوا ازاي؟
سامر: عادي، هنتعامل مع الرشاوي العينية زي ما بنتعامل مع الجوائز, الواحد لما يستلمها يدفع مبلغ قبل استلامها.
القاضي: لكن الرشاوي شيء غير قانوني وإذا دفع أحدهم ضرائب عليها هيكون ده اعتراف ضمني بالحصول على الرشوة وبذلك ممكن تدخلوه السجن؟
سامر: لأ الحكومة يعني.. هتعتبر ده علامة على حسن النية ومش ممكن الحكومة تضر بأبنائها البارين حسني النوايا...
القاضي: ده يفسر حاجات كتير..
جاسر: أنا لسه عندي اعتراض..
القاضي: إيه تاني؟
جاسر: لسه فيه بند خاص بالتفريق بين المواطن المرتشي والمواطن غير المرتشي....
القاضي "لسامر" : إيه حكاية الموضوع ده؟
سامر"بكل بجاحة" : يا فندم -بالعقل كده- ازاي نساوي بين مواطن بيدينا ضرايب على دخل ما يزيدش عن 200 جنيه هو كل مرتبه من الحكومة، ومواطن تاني بيدفع ضريبة أكبر!
القاضي: دخل من الرشاوي؟
سامر"مراوغا": بغض النظر، لكن مين بيدفع أكتر من الدولة؟
جاسر: قصدك مين بيسرق أكتر من الدولة؟
القاضي "متحيرا": أنا لسه مش فاهم موضوع المساواة بين المواطنين ده..
سامر "بالزوجة": يعني يا فندم مثلا ابن اللي بيدفع آلافات للحكومة ماينفعش يتعلم في نفس المدارس اللي بيتعلم فيها ابن اللي بيدفع ملاليم..
القاضي "مغتاظا": قصدك إيه؟
سامر: قصدي يعنى إن احنا هنعطي شوية امتيازات للمواطنين اللي بيقدموا دخل أكبر للدولة..
جاسر "محروق دمه": سمعت يا سيادة القاضي، ده معناه إيه غير إنه تشجيع على الفساد..
سامر: يا خبر منيل، إنت بتشتم في الحكومة...... "وبحماسة زايدة عن اللزوم" إنت عميل خاين إنت "واستمر سامر في سرد عدة اتهامات لجاسر تودي في داهية ولم يوقفه إلا صراخ القاضي"
القاضي "صارخا": بس كفاية، أنا فهمت ملابسات القضية وحكمي هيكون سري لن يطلع عليه إلا ذوو الشأن...
جاسر "ساخرا": من السادة المرتشين..
القاضي: اسكت من فضلك..
"وكما ترون فإن الحكم سري ولذلك نطلب منكم الكتمان ونعدكم أنكم ستسعدون كثيرا بالحكم"
حكمت المحكمة بتطبيق القانون لمدة عام، يتم بعده القبض على كل من ثبت عليه جريمة الرشوة وعقب ذلك يتم القبض على الحكومة وذلك لتغاضيها عن عمليات غير مشروعة وكذلك التربح غير المشروع عن طريق تقاضي ضرائب من دخول غير مشروعة. |
ساحة النقاش