امسك مترب

دعا الملك شهريار جميع حراسه وأحس الجميع أنه سوف يعلن إفلاسه، وقدم كل حارس برهان إخلاصه، وأعلن أنه سيكافئ من يأتي له بآخر خبر عن الموبايل "ستة ستمية".. أصل دي عدة مية مية.. فقدها الملك أمس.. كانت ليلة نحس.. عندما تحسس جرابه.. شعر بخيبة أمل عندما فقد كمان شرابه، وتذكر شهريار أن الموبايل عليه صورة لشهرزاد.. يا خبر أسود دي صورها هتتباع في المزاد.. وعليه كمان أسرار البلاد الطف يا رب العباد

 ودخلت شهرزاد ومعها الكاس.. فصرف شهريار الحراس، وقدمت أرقى آيات الإخلاص، فعنفها الملك: إنتِ السبب.. لولا الليلة بتاعة امبارح...
فقطاعته بلهجة لا تخلو من الدلال: وأنا مالي يا أخويا إنت اللي كنت سارح وبعدين أنا لقيته في الصندوق الكبير. ملفوف بشريط حرير.. كنت حاطط عليه أغنية تامر "ارجع لك يعني حرقة دم.. أسمع لك كل كلامك غم..... عايزاني لا تاني لا...."..

مش دي نغمة مراتك التانية.. فعاتبها الملك بحنية:
خلاص بقى يا ستي حقك علي.. يلا بقى احكي لي حكاية.. بس من البداية.. فاعتدلت شهرزاد: بلغني أيها الملك الفايق.. إن عبده الرايق.. المطرب الشهير.. صاحب الجمهور الغفير.. اتهمته الصحافة بإنه حرامي كبير.. بدليل أغنيتة الشهيرة "يا عيني على الفول المدمس بشوية زيت حار وتخش على طول تغمس إيييييييييـيه".. هي ألحان مطرب صاعد اسمه "عباس حمص"، وإزاء هذه الاتهامات قرر أن يرد بنفس المساحات فاتصل بالمذيعة "جيهان مكسرات" لتستضيفه في برنامجها أصعب الأزمات.

وكل يوم والصحافة بتهاجم، وصرخ المطرب وراح لاطم، وفي البرنامج قالت جيهان: "أحزائي الشاحدين النحارده حبده.... يا عيني على حبده يا روحي على حبده... احم... آه حبده الرايق هيرد على الاتهامات" وأخد عبده المايك.. دول شوية اتهامات صايعين.... بيكتبوا وهم نايمين عايزين يدمروا مشوار السنين.. من الآخر ده هجوم سافر.. وأنا هارد عليهم أصل أنا بقى قادر. اتصل أحد المشاهدين عبر الهاتف وراح تافف على عبده واتهمه بأنه حرامي الملكية الفكرية فرد عبده: أنا ماعرفش حد اسمه طنط فكرية، واتصل آخر طلب منها يسمعه أغنية من الآخر ويهديها لابنه المسافر.

فاحمر وجهه وغاب عن وعيه.. احم... احم... احم.. آه.... أصل... آه وأدركت "جيهان مكسرات" الرد فأخذت المايك أصل عبده عنده برد وتهللت أساريره ولكن المشاهد أصر أن يسمع صوته لأنه أسيره وأن يسمع الأغنية، ودي مجرد أمنيه، وهنا غمزت جيهان لمهندس الصوت يلا أهي أغنية وتفوت وأطرب عبده الفتيات الحاضرات وكمان الجمهور.... مستحيل أن يكون ده صوت المطرب المشهور... ده صوت كلب مسعور.... ووقفت الفتيات عن الرقص والحركات وأصيب الجمهور بالصمم وقذفه الجمهور بالجزم... فقد انقطعت الكهرباء وهجم الجمهور عليه كالوباء ولأن البرنامج كان على الهوا وخلاص مفيش دوا.. فعلق عبده: أنا كنت حاسس.. هارجع لمهنتي الأصلية سايس..