نائب... آه ونص

بلغني أيها الملك المحلاوي أن الفلاح زعبلاوي قرر بعد رحلة كفاح أن يعلم ابنه حتى لا يصبح إرهابيا أو سفاحا..

واجتاز عبده المرحلة الابتدائية والإعدادية والثانوية والجامعية بتقدير امتياز وقرر أن يكمل مشوار أبيه بكل تقدير وامتاز، بلغه قرار التعيين ولما قدم إلى الجامعة قالوا له إنك لست من المبسوطين، فخد ورقك وارجع فإنت بالنسبة للتعيين من المحرومين وبدأ والده في البحث عن الواسطة.

دلوه على عضو مجلس الشعب كفر الباسطة فاستقبله العضو "عصفور" قابله بكل تناكة وغرور.. قال له ابنك هيتعين معيد في الجامعة، والدنيا كلها هتبقى سامعة.. هاخد عشر تلاف ومفيش فصال خمسة كاش وخمسة كمان بدون إيصال..

هاجيب فلوس منين دي تحويشة السنين ما تجيبش ألفين "اضطرت أم عبده أن تبيع سيغتها وكمان الجاموسة الخلبوصة دي كبرت خلاص وبقت قلبوظة.. أبو عبده رهن أرضه للبنك.....

أهم حاجة عبده هو الحيلة، وهو اللي هيشيل اسم العيلة، يا عمي كبر بلا نيلة، عم عبده خد الفلوس واصطبح بوش عباس المنحوس.. استر يا رب ابعد عنا النفوس.

وراح زعبلاوي للنايب.. تأسف له موظف المكتب قال له ده غايب والأيام بتجري والنايب في المركز.. أبو عبده مش قادر يركز، وجاءته البشرى أن البيه خلاص هييجي بكره.. ما قدرش ينام ليلتها قعد يحلم من ساعتها، وعلى طول انطلق للنايب فشمشمه وقال له عايز إيه.. جرى إيه يا سعادة البيه أنا أبو عبده.. آه خلاص عرفت يا سي زفت.. الفلوس جبتها بالعافية أم العيال باعت المداس وبقت حافية، والله احنا ناس غلابة.. إنتم أعوذ بالله ده إنتم دبابة.. بطلوا بقى قلاطة وطلع من تحت البلاطة، وسلمه المبلغ ووعده البيه بروب دي شامبر إنتاج شهر ديسمبر.

بس تقول إيه فيه ودان كانت سامعة وطب البوليس في ثوان والبيه قعد يشتم ويسب أنا عندي حصانة دبلوماسية.. إنتم فاكرينها إيه خرابة ولا تكية؟ فرد عليه الضابط قدامي يا أخويا ده من النايب العام، معاك جنسية من كفر الحمام وهربان من التجنيد.. فاكر يا بليد... يلا كلبشوه بالحديد