قولي

أنا حضني قلبي مش كتافي
اوعاكِ يوم تنسي وتخافي
وان جم ف يوم سألوكِ عني
قولي ان حبي ده شيء خرافي
قولي ان فرحي ف وسط جرحي بيتولد
قولي ان قلبك شيء مقدس يتعبد‍

أنا حبي ذنبي وباعشقه
يكره شيطاني ويحرقه
رغم ان نفسي اكون إنسان
لكنه حلم وباسرقه
قولي ان حبي ليكِ أكبر م الذنوب
وان شروقي بيتولد ساعة غروب
واني مش ممكن يا غالية راح اتوب
لو شايفة نوري بيبتعد
قولي ان فرحي ف وسط جرحي بيتولد
قولي ان قلبك شيء مقدس يتعبد

تعبت كتير وانا ماشي بقلب حزين
باحس الفرح بدموعي وشوق وأنين
باحب بجد وعيوني سكن ليكِ
لكن قدري أنا وانتِ نكون تايهين
قولي ان يأسي راح يكون أملي الوحيد
وان البداية مش نهاية لكل عيد
واني أول من يكون فيكِ شهيد
لو حسه قلبي بيتجلد
قولي ان فرحي ف وسط جرحي بيتولد
قولي ان حبك شيء مقدس يتعبد