الفجــــــــر

الفجر
أدان
بيدقّ بيبان البيت
ويصحّي أبويا
يقوم... يتوضّا
يصلّي
يروح ع الغيط
والنَّدا بيحط على الشخابيط
توبُه الفضَّه
وعيال واقفين
في طابور العيش
على وشّ العيّل كيلو ردّه
وأخويا "احمد"
راجع م الجيش
وفاضل له شهور على باقي المدّه
ويفكّ سجون
حلمه المركون
ويشوف لا يكون كُتر الأيام خلاّه صدّى
وانا واقف
باتهجّى ف نفسي
وباحاول
أخرج من يأسي
وأرتّب حلمي وأيّامي
والدنيا بتقفل قدّامي
كل الأبواب
كدّاب الشعر
كدّاب
الفجر
ماجاش
ولا خطّا اعتاب البيت
ولا فاكر إني فْ يوم...
حبّيت
ولا فاكر إني ف يوم...
غنّيت
ولا فاكر إني ف يوم...
حنّيت
وندهت عيونك تحضنني
غيرش انّي
اتخيّلت ف نومي
إن الفجر بيكنس بيتنا
من باقي امبارح وضلامه
وان عينيكِ جت وزارتنا
والقلب اتهنّى بأحلامه
وانا لمّا صحيت
مالقيتش الفجر ولا عينيكي
فالفجر ماجاش
والحلم ماجاش
ولا واحد خطّا البيت