رزازيات

طول عمري أقول مفيش زي البلد دي وناسها، ناس دماغ بجد، ولأن الشعب دماغ بيفرز عن حكومة دماغ أيضا. ولذلك نجد أننا نحظى بحكومة دماغها كبيرة قوي. جاء هذا الخاطر في بالي وأنا أدفع مصاريف الكلية ومن ضمنها كام جنيه دمغات ومصاريف و....و.... ".

تخيلوا إن فيه دمغة بخمسة جنيه.. "آه ياني يا جيبى!"، وتذكرت الأربعين قرشا الخالدة التي أدفعها دائما كدمغة مع كل شيء. 40 قرش دمغة مع فلوس المجموعة، 40 قرش مع طلب اشتراك المترو، 40 قرش مع طلب ختم على طلب مش عارف إيه، وعلى استـــــمارة إيـــه. ولاحظوا أنها دائما 40 قرشا لا 50 قرشا، وكان ممكن الحكومة تخمنا وتاخد النص جنيه كله، لكن احنا حكومتنا حكومة عسل ماتقبلش على نفسها بريزة حرام!

وهنا تتبدَّى لنا دماغ الحكومة الكبيرة فهي لا تقطع جزءا كبيرا من مرتبك مرة واحدة، ولكنها تأخذه "سحتوت... سحتوت" حتى لا تشعر بأنها تأخذ أموالك –لا سمح الله-. وهذه بالطبع سياسة حكومية رشيدة، حتى لا نتضايق أو نتعب من كتر الدفع. شفتم بقى أنا باحب البلد دي ليه؟! عشان حتى لما بيمصوا دمك بيمصوه بالراحة.

ولذلك أنا أدعوكم أنتم أيضا أن تعاملوا الحكومة بالراحة. يعني عايزين تنتقدوها، انتقدوها بس "بالراااحة". عايزين تعملوا مظاهرة اعملوا مظاهرة، بس بلاش اللمة الكتير، اعملوها مظاهرة فردية. تخرج من بيتك تمشي في الشارع من سكات وإنت في نيتك إنك بتتظاهر بس بالراااحة. لغاية ماهييجي يوم ونرتاح كلنا جدا، واحنا نازلين القبر طبعا، بس ماتنساش تحضر في إيدك وإنت نازل 40 قرش عشان مفيش دخول قبر من غير دمغة.