مع السلامة يا قلم

صه يا قلم..
ماشي حزين فوق الشطوط
تبكي اللي حاصل والزمن
فجأةْ عِلِيتْ بالصوت غريق
والكل سادّين الودان
سمعك صعيدي نط بهدومه الخليج..
وغرق معاه
مين العبيط..؟ لما الغريق كان الوطن

صه يا قلم..
ماشي على خطوط الورق.. دايما صراخ
مين فزّ قام غاث الوطن؟!!
غير اللي داق لبن الخيام
صرخت يمناه بالحجر.. فلق النهار
غنت عيون الانبهار..
تسلم يمينك ياولد
آه يا قلم.. مين منه غار؟!!

صه يا قلم..
ماشي علي خطوط العفاف
مين اللي رايد سكتك؟!!
بتغني في طول البلاد..
مين اللي ردّد غنوتك؟!!
وتطوف وتِشْعِرْ في السواق..
إيه تشتري ولمين تبيع؟!!
طب خشّ في دروب الإشي..
ما تـختشي
تربح وتعلا ع الكتاف
أُبَّحْ وغناها الجميع

صه يا قلم..
نازل صراخ في كل الساحات
جات العوالم أرضنا طرحت صاجات
أصل عندنا فيهم نقص عمالات
وحاجات بتسري ف دمنا.. نرقص وهات
سرطان كلى.. تكسير عظام.. سكر... وجات
عَصَر التقدم قلبنا.. اللي بنصبح فيه نبات
آه يا زمن
الهلف عامل سبعنا..
باعنا لمين؟ دي القدس هالها رخصنا
نزلت دموعها والحجيج فوق (عرفات)

صه يا قلم..
تعبتني طب وليه أنا بامسكك
وامشي معاك كل السكك؟!
نجني الندامة
علمتني عشق القمر..
وزرعت في عيوني السهر..
وده ليل ديابة
آه يا قلم.. الكيل طفح..
صوتي اندبح
صدق اللي قال إنك "ألم"
حانسى الكتابة ياقلم..
ومع السلامة