علشان ما تروحش في داهية

كلنا بنحب نمشي جنب الحيط ونقول "يا حيط داريني", أصل الكل دلوقتي مشغول بلقمة العيش، ومابيطلبش أكتر من الستر, وطبعًا اللي مش طالب أكتر من الستر ده أكيد مش عايز يدخل في سكك مالوش فيها وحدّ يجرجره في كلام يودّيه في داهية.. ما هي الحكاية مش ناقصة..

وقبل ماحدّ يفهمني غلط وأروح في داهية أحب أقول إن الكلام اللي يودّي في داهية ده أكيد هيكون تخبيط في الحكومة!.. ياريت ماحدّش يفهمني غلط وخلـّيكو معايا للآخر.. أنا عايز أوضّح إن أشكال الحكومات بتختلف عندنا في الوطن العربي!.. معلش.. خلـّيكو معايا للآخر.. هتبدءوا تفهموني أهه.. خصوصًا لما أقول إن أشكال الحكومات بتختلف من شخص للتاني..!

صدقوني.. أنا مش باقول فوازير, فعلاً نوع الحكومة بيختلف حسب الحالة الاجتماعية, يعني مثلاً الشاب القطقوط ده اللي لسه بياخد مصروفة من السيد الوالد أكيد يبقى بابا هو الحكومة بتاعته, وماينفعش يخبّط في الكلام معاه, وأنا ماقصدش حاجة وحشة لا سمح الله, أنا أقصد يعني إنه مايعترضش على أي حاجة بابا يقولها في البيت, ولسانه لايخلو من عبارات التأييد والإعجاب بقرارات السيد الوالد بشأن التوفير من الميزانية في المرحلة المقبلة من أجل شراء سيارة جديدة, وطبعًا هذا التأييد و"التثبيت" بينّا كده يا شباب وبين بعض لازم يكون في إطار خطة تهدف إلى وضع السيارة تحت تصرف المهذب المطيع "حمادة".

وعلشان ماتروحش في داهية يا أخ "حمادة" أكيد لازم ترضي بابا وماما وماتحاولش تضايقهم عشان بابا مايقطعش عنك المصروف وماما ماتقطعش عليك خط التليفون لمّا بتفضل شاغله طول الليل مع الأمّورات (جمع أمّورة) الحلوات اللي بتفسحهم بعربية بابا.

ده بالنسبة للشباب العزّاب قبل ما يدخلوا القفص.. اللي يقال عليه إنه ذهبي, ولمّا يفكر العازب في تغيير نظام الحكم لا يشترط الإطاحة بالحكومة الحالية.. بل يستغلها بكل براءة لتساعده في مرحلة انتقال الحكم إلى حكومة أخرى, وطبعًا الانتقال من حكومة إلى أخرى يحتاج إلى حكومة مؤقتة للمرحلة الانتقالية, زمانكم فهمتوني وعرفتم إن أنا أقصد حماته.. تتولى الحماة دور الحكومة المؤقتة لحد ما تطمئن على بنتها وإنها قادرة أن تتولى الحكم وأن الأمن مستتب وكله تمام.

وعلشان ماتروحش في داهية خلال المرحلة الانتقالية لازم ماتخبّطش في الكلام مع حماتك وتعمل لها كل اللي هي عايزاه, ماذا وإلا هتنكـّد عليك عيشتك ومش هتعرف تتهنـّى بفترة الخطوبة اللي يقال عنها إنها أجمل ما في الزواج.

وبعد استقرار الحكم في إيد الحكومة اللي حضرتك اختارتها يسعدني أقول لك إنك وصلت إلى الحكومة الأبدية اللي مهما هتعمل فيك تلاقي نفسك صابر ومستحمل عشان خاطر مراكز القوى (الأبناء) اللي بيمثلوا مصدر ضغط لذيذ، ولازم تحبه لأنه مصدر لسعادتك, وماتنساش إنهم همّ الوحيدين اللي هيخلوك حكومة زي ما كنت بتعمل مع بابا يا "حمادة" بيه..!

ملحوظة مهمة جدًا جدًا جدًا:

علشان ماروحش في داهية.. أنا لمّا قلت إن أشكال الحكومات بتختلف عندنا.. وحددت: "في الوطن العربي" كنت أقصد إن العرب همّ الوحيدين اللي بيعملوا اعتبار لأسرهم وعائلاتهم, لكن الغربيين مش فارقة معاهم.. الكل منفّض لأهله ومش لاقي حد يحكمه.. وكفاية لحد كده علشان مانروحش في داهية.