أبكي على قبرك

* رايح لِفين يا حبيب؟
- رايح بلاد البٌعاد...
* والغربة ليه يا حبيب؟
- إمتى ما كنتش غريب؟
* وانا مش وطن يا حبيب؟
- إنتِ وطن إنتِ؟!
يا مسودة عيشتي...
رامياني للتيار...
* بقى كده يا حبيب!
تنسى ليالي السهر..
وعشقنا الغلاب..
- غلاب ..غلبني أنا..
وضعت من 100 سنة..
وإنتِ كده ناسية..
ونايمة مبتسمة..
* إمتى بقى أنا نمت؟
يا حبيب يا قاسي القلب..
من 100 سنة أنا مٌت
وإنتَ ماعزيتشي..
- مٌتّي كمان يا امّا؟
يعني أنا اتيتمت؟
طيّب وأقعد ليه؟
* يا حبيب مايمكن أعود..
- يا امّا اللي مات ما يعود..
* والبعث يا حبيي..
ده البعث بعده خلود..
- عقبال ما ييجي البعث..
أكون أنا اتعفنت..
ترضيها دي يا امّا؟
* يا حبيب لو انت سافرت..
مين يبكي على قبري؟
- الوعد ليكِ يا امّا..
مع كل يوم جمعة..
أبكي عليكِ واصرخ..
واترحم على أيامك..
مع السلامة يا امّا.
***
يا حبيب سايبني لمين؟
يا حبيب سايبني لمين؟؟
*****
لكن ما كان فيه رد.