الدٌنيا زي الغفير

الدٌنيا دي زي الغفير
شنب كبير وبندقية..
بيهٌم يخوّف كل الصغار
أما الكٌبار -في القصر فوق-
ينزل عشانهم شنب الغفير
والبندقية في إيده تحمي كل كبير.

****
واليوم يعدي وراه سنة
وأقول هيكبر بكره الصٌغيّر

لكن يا بٌكره هتيجى إمتى؟
عدِّت سنين
والغفير لسه الغفير
والكبير لسه الكبير
واحنا لسه صغيرين
إمتى نكبر؟
و نقول "زماااان كان فيه غفيييير شنبه كبيييير"
وننسى أيام الصِغر
ونبني بيتنا في القمر
ونبقى أطول... أطول.... وأطول
ولا بندقية تهمنا
ولا يوم شنب هيهزنا...