"البصة بخمسة جنيه... والحسابة بتحسب"

لم يكن يخطر ببالنا نحن شباب العولمة وثقافة الصورة وعالم ما بعد الحداثة أن يحدث لنا ما يحدث، فما فعلته الحكومة لم يكن بالأمر السهل حتى نتغاضى عنه، فبعد ضريبة المبيعات وضريبة الدمغات قامت الحكومة بـ..

قامت بإيه يا أخي؟.. انطق.

قامت بتأسيس إدارة للنظرات..

نعم؟ يعني إيه إدارة للنظرات؟
يعني أي شاب هيشوف واحدة حلوة معدية قدامه هتشوفه الإدارة الخاصة بالنظرات وتديله جزاءه، والجزاء حاجة عال قوي، لو بصيت بصة كاملة، البصة دي تسعيرتها خمسة جنيه، أما بقى لو عندك ذمة وادتها نص بصة، هتكون بـ 3 جنيه..

طب ازاي؟ المفروض إن نص بصة بـ 2.5 جنيه..
ما هو يا فالح فيه نص جنيه ضرايب.. أصل اليومين دول الشباب اتظبط...

بس فيه سؤال محيرني: ازاي الإدارة هتعرف إن فلان بص لفلانة؟..
ودي عايزة نباهة، الإدارة واثقة إن شبابنا متفتح وذو ضمير واع وعقل مستنير والشاب لو نظر لأي فتاة هييجي يبكي ويذرف الدموع، وهيعترف بأن ما فعله يستحق الإعدام، وبالطبع الخمسة جنيه أخف من الإعدام..

بس أكيد مثل كل الشباب هيقعد يعيط ويعيط..
أنا معاك.. عشان كده الإدارة جندت بعض الفتيات إنما إيه حاجة علي الفررازة، وظيفتهم إنهم يمشوا في نص الشارع أو في الميادين أو يمروا على أي قهوة، وبعدها بثوانٍ بيعدي كمين ويلم كل القاعدين.. بس أنا بقي بيني وبينك استطعت أن أفلت من هؤلاء بحداقة..

ازاي بقى يا ناصح؟
يا ابني لا ناصح ولا صايع كل اللي كانوا قاعدين على القهوة ماكانوش لابسين نظارت سوداء، ومش معقول الإدارة الخاصة بالبصات هتقدر تكشف هذه الحيلة، شفت أنا جدع ازاي وفهلوي..
شفت قوي.. اتفضل اتفضل بقى معايا علي الإدارة المركزية..

ليه؟.. خير؟!
أنا يا سيدي مدير الإدارة بتاعة النظرات.