لعبتنا الجميلة

أنا طالبة جامعية بائسة في السنة الرابعة وادعولي بقى آخد البكالوريوس وأخلص، المهم دلوقتي إن الموضوع مالوش دعوة خالص بالكلية، الحكاية بدأت وأنا في إجازة تانية ثانوي..

في الوقت ده حسيت إن فيه حاجات مريبة بتحصل في البيت، وماما على طول رابطة دماغها وبتعيط ومكتئبة (هي غالبا كده) بس في الفترة دي كانت الحكاية أوفر قوي.. المهم أنا وأختي اللي أكبر مني بسنة واحدة، وأخويا اللي أصغر مني بـ 5 سنين عملنا نفسنا هبل قوي، ومش فاهمين حاجة، بس كنا من تحت لتحت بنحاول نفهم هو فيه إيه..

وفي يوم من الأيام عرفت خبر مش عارفة هو حلو ولا وحش بس غريب..

اكتشفت بالصدفة إن ماما بتكلم خالتي (الله يرحمها) وبتعيط، قلت لازم بقى أعرف فيه إيه بالظبط.. المهم بالصدفة يعني وأكيد من غير ما أقصد (إنتم فاهمين طبعا)، سمعت خالتي بتقول لماما إنتِ مش أول واحدة يحصل لها كده، وبعدين إنت لسه صغيرة..

ملحوظة: وقتها ماما كان عندها 38 سنة..

المهم، فهمت كده -والله أعلم- بس كدبت نفسي، إن ماما -لا سمح الله- حامل، وقلت يالهوي بعد السن ده ييجي لنا عيل يقرفنا ويقعد يعيط، وبعدين أنا عندى ثانوية عامة.. أسقط يعني ولا إيه.. وبصراحة الحكاية مش ناقصة عيال صغيرة.

المهم تأكدنا من الخبر المشئوم (ده كان تصوري وقتها للوضع الحالي)وكنت على طول أسمع ماما تقول لبابا: "لازم العيل ده ننزله"، وبابا يقول لها: "حرام علينا نعمل كده.. خلاص بقى دي إرادة ربنا.. هنعمل إيه"..

وخلاص حاولنا نستوعب الوضع اللي احنا فيه، وماما طبعا بتحاول لأن الفرق بين النونو وأخويا الصغير أكتر من 11 سنة، وطبعا بيني وبينه أكتر من 16 سنة، وبينه وبين أختي الكبيرة أكتر من 17 سنة، طبعا دي أرقام كبيرة، بس نعمل إيه بقى؟ دي إرادة ربنا..

ومرت الأيام وفي الأيام الأخيرة، ماما ضغطها علي جدا والدكتور قال لها: "إنت لازم تولدي بكره، وكمان قيصري علشان خاطر البيبي، طبعا ماما سمعت قيصري دي واتخضت، بس يلاّ اللي حصل حصل..

وراحت ماما المستشفى، وكمان ماحدش عرّفنا إنها هتولد، وسابونا على عمانا، وبعد ما ولدت اتصلوا بخالتي التانية وقالوا ليها: "أختك بتولد في المستشفى"، طبعا خالتي اتخضت لأن ماما كانت مخبية على الكل، باعتبار إن دي فضيحة، والحمد لله ولدت بنت مناخيرها كبيرة، مش عارفة جابتها منين، بس باستثناء كده قالوا إنها شبهي في شعرها الحمد لله، أخدت حاجة مني، واللذيذ في الموضوع إني سافرت القاهرة تاني يوم لمسابقة تبع المدرسة لأني من الغربية..

ورجعت بعد تلات أيام، طبعا مالحقتش أشوف البنت اللي بيقولوا عليها أختي دي، ولما رجعت بصراحة ماقدرتش أقوم من جنبها، لأنها كانت صغنونة قوي وعسولة خالص..

وقلت لماما: "شكرا على الجميل اللي إنت كنتِ عايزة تفرطي فيه ده"..
وبعدين بقت كل حياتنا ولعبتنا الجميلة ونجحت في الثانوية العامة وجبت 96 % مع إني علمي رياضة، وقلت "كل ده بسببها".. وبقت كل حياتي وأنا اللي ربيتها وكبرتها.

ودلوقتي -الحمد لله- تمت 4 سنين في شهر اتنين اللي فات، وبقت عسولة وفي قمة اللماضة، بس في الآخر برضه هي حبيبة قلبي اللي ماقدرش أتخيل حياتي من غيرها..
ربنا يخليها لي..
معلش طولت عليكم، بس عايزة أقول حاجة "إن الخيرة فيما اختاره الله".. وربنا يوفق الجميع..