سياسة الأسبرين

بقالي فترة أدوّر فى الصيدليات على كِرِيم الشعر اللّى بستعمله، بس مافيش فايدة ! مش عارفة ألاقيه. وفْي يوم كنت باشترى حاجة من بوتيك بعيد عن البيت شوية فعدّيت على صيدلية كنت أعدّي عليها كل ما أروح البوتيك ده، لكن عمرى ما دخلتها، ويا محاسن الصُّدَف! بَابُصّ في الفاترينه لقيت الكِرِيم بتاعي، فدخلت على طول وطلبته من الصيدلي اللي قام وجابهولي وقالّي إنّها آخِرعلبة . بدأت أدوّر على تاريخ الصلاحية وأعمل كشف هيئة عليها، فلقيت الدكتور مُبتسم قوى!!! ودار بيننا الحوار ده:

•  د : هو إنتَ في كليّة إيه؟
•  أنا : آداب انجليزى. حضرتك بتسأل ليه؟
•  د : وفى سنة كام؟
•  أنا : رابعة. بَرْضُه لِيهْ؟
•  د : هاااايل.
•  أنا : طَبْ أنا هاخُدْ العلبة دِي، اتفضّل الحساب.
•  د : إيه رأيِكْ تشتغلي ف صيدلية ؟
•  أنا : أفندم ؟؟!!
•  د : أنا مستعدّ أخلّيكى تدّرّبي الصيف الجاي هنا في الصيدلية مع سالي بنتي، فْ تانية صيدلة ، وأنا متأكّد إنك مع الوقت هتبقي كأنك دكتورة صيدلانيّة تمام، وكمان الناس هتسأل عليكي بالاسم. أكيد إنتي مش عايزة تقعدى فى البيت بعد ما تخلّصي دراسة ، مش كده برضه ؟
•  أنا : أكيد طبعاً. عموماً أنا متشكّرة على الثقة دي، وما حدّش عارف بكره فيه إيه.

وخرجت من الصيدلية ودماغي بتلفّ: آداب انجليزى.. صيدلية.. هى دي آخرتها؟!.. أشتغل حاجة مالهاش علاقة بدراستى، وكمان مالهاش مستقبل بالنسبة لي.. معقول؟؟!!