خدنا أجازة

من زماااااااان قوي، لما كنّا صغيّرين ومتشرّدين، رُكَبْنَا مليانه
ميكروكروم وسنّتْنَا القدامانيه واقعه، مكانش فيه غير أجازة واحدة معترَف بيها عِيَالِيًّا (الأجازة الكبيرة)، واللي كانت بتبدأ أول ما ننزل من آخر لجنة في السنة، والتي غالبا ما تكون في فصل تانية أوَّل أو أيّ حاجة أوَّل (ماعرفش ليه).

ومن زمان قوي برضه كنا نقطّع ورقة آخر امتحان ونعملها عصافير نرميها في الهوا ونردّد في سيمفونية نشاز مرحة "لا مُذَاكْرَة بعد اليوم. لعب الكورة أهمّ أهمّ." وهذا الشعار اتفق عليه الولاد والبنات بالرغم من إن اهتمامات معظم البنات في هذه السنّ بالكورة لا تتعدى اهتمامات حضرتك بدراسة اللغة السنسكريتية.

لكن لما عجلة الزمان دارت (كح كح، اشندني يا ابني) اختلف مفهوم الأجازة كلّيّاً وجزئيا عندنا، وبدأنا نفكر في حاجة تانية غير الكورة نقضي بيها وقتنا ونقعد نعمل خطط ومشاريع وأحلام عريضة، أيْ نعم ما بتتحقَّقْش، لكن برضه بنحطّها في دماغنا، وكل واحد بيقول في سره "الوقت مش لازم يطير زيّ أجازة السنة اللي فاتت.".