السارينة

كل الناس يومهم بيبدأ لما النور يطلع وأنا الوحيدة اللي يومي بيبدأ لما الدنيا تضلم. وكل الناس بتصحى على صوت البلابل والعصافير وفي أسوء الحالات على صوت سارينة أتوبيس العيال ولاد الجيران وأنا بصحى على صوت أحلى سارينة في الدنيا...... سارينة "زيمو" ابن أختي..

والغريب إني اتعودت على سارينته وساعتي البيولوجية اتظبطت عليها وان جيتوا للحق الولد مظبط نفسه تمام الساعة اتنين إلا تلت يبدأ الزن وإلا ربع يقوم يقعد على السرير وإلا عشرة لما يلاقي إن مفيش فايدة منا يلجأ الباشا للأساليب الملتوية زي القرص وشد الشعر ومع دقات الساعة الثانية تنطلق سارينة "زيمو" معلنة عن جوع شديد وبلل أشد. بس النهاردة حاجة غريبة جداً حصلت، ساعتي البيولوجية هيّ اللي صحتني وفضلت مستنية السارينة علشان أقوم وفضلت مستنية...... مستنية..... لما زهقت بصيت في اللي اتبقى من المنبه بعد ما لعب بيه "زيمو" لقيت الساعة 2,30 يعني السارينة متأخرة نص ساعة بحالها.. . دي عمرها ما حصلت وفي حركة بهلوانية أمريكانية رهيبة نطيت من فوق السرير و جريت أشوف "زيمو" ماله... دخلت عند مامته اللي هيّ أختي لقيته يا عيني نايم على السرير ومامتي اللي هيه جدته بتعمل له كمادات وبابايا اللي هو جده بيتصل بالدكتور.... "فيه إيه يا جماعة إيه اللي بيحصل؟؟؟؟!!!!" "زيمو" حرارته 39ْ مشيت لغاية السرير وأنا مش قادرة أستوعب... يعني هو كده تعبان يعني ولا إيه اللي بيحصل يعني؟ مش حيقوم يقعد و يمد إيديه علشان أشيله؟ ولا إيديه الكريمة حتنزل تسلم على خدي؟ ولا حينط ويحضني؟.... ولا..... ولا...... هو فيه إيه؟؟ حد يفهمني.

محدش فاهم حاجة حتى مامتي بخبرتها الطويلة في تربية قبيلة تتمثل في تلات قرود من البنات مش عارفة تعمل حاجة. فضلنا كده لغاية ما "زيمو" راح في النوم واحنا جنبه... اللي تولت مسؤولية وضع المياه في التلاجة واللي مسؤولة عن قياس الحرارة واللي بيتابع مع الدكتور واللي........ كله مش قادر....... كله راح في النوم جنب الباشا الصغير في خريطة رائعة كلنا نصنا على السرير والنص التاني على الأرض ده بالنسبة للبنات... أما بابايا سند على الدولاب وراح في نوم عميق وأنا كمان نمت وحلمت إن بكره مفيش شغل ولا قلق مفيش غير........" آآآآآآآآآآآآآآآآآآآآآآآآآآآآي ليه كده يا ابني" صرخة أطلقتها أم زيمو خليته اتخض و بدأ يعيط "فيه إيه يا بنتي إيه اللي حصل "ده كان سؤال مامة أم زيمو " مش عارفة يا ماما باين "زيمو" قرصني في إيدي بس جامد قوي "رحنا كلنا علشان نبص على إيدين أم زيمو ملقناش حاجة غير علامة صغيرة على إيديها علامة تشير إلى أن "زيمو" بقى عنده سِنة ألف مبروك يا جماعة كل اللي حصل ده كان من علامات تسنين الباشا يعني من النهاردة مش حنصحى بالقرص وشد الشعر بس وإنما كمان بالعض وعلى صوت أحلى سارينة....... سارينة "زيمو" باشا.