باحب الويب!!

مساحة كانت جديدة عليّ، مكنتش منتظرها أو حتى كنت باحلم بيها، في اليوم ده من كام سنة مسكت كابل التليفون، وبإيد مرعوشة غرزته في الكمبيوتر الجديد اللي يادوب اشتريته، المهمة: الدخول ع الويب، الهدف: مش عارف.. فضول يمكن، البحث عن طريقة جديدة للتواصل مع النفس من خلال مجموعة أسلاك وتقنيات مش عارف بتشتغل ازاي..

وعلى الرغم من تحفظ البدايات وشكوك النجاح في المحاولة، ماخدتش وقت طويل عشان أسرح في الدنيا الديجيتال دي، وبعد الحصول على الـ Options التقليدية زيّ أيuser محترم (إيميل، أخبار، مزيكا، chat)، أصبح الويب جزء رئيسي في حياتي، شئت أم أبيت، مساحة فرضتها على نفسي ورضيت بيها، ومع إيماني بإن الحياة ممكنة جداً من غيرها، إلا إني باكافح يومياً لاكتشاف مزايا وإضافات جديدة، تأكد المساحة دي في حياتي..

ومن أول حصولي على المزيكا اللي غلبت ألاقيها قبل كده، ولحد الـ mail التاريخي اللي عرفت منه إني مسافر اليابان، قررت أعمل اتفاق شراكة مع الويب، يحصل هو بمقتضاه على جزء محترم من حياتي، وأحصل أنا من خلاله علي طعم جديد للحياة دي، ابتديت أعمل "لينكات" بين الويب وبين أحلامي الشخصية، اللي ابتدت تتحقق يمكن بكتابتي ليكم كمحرر هنا، في موقع على الويب.. إذن فيه أمل..

أنا موافق إننا بنبعد عن بعض، وإن الويب ساعات بيبقى منفى اختياري لكتير مننا، لكن أنا باشوف إنه ده مجرد سوء استخدام، ظروف مش أكتر، الويب مالوش دعوة، المشكلة فينا إحنا، وباراهن على الويب في حل نفس المشكلة، هنا في المساحة الديجيتال دي باقترح عليكم متسجنوش روحكم في شوية أسلاك زي ما أنا باعمل ساعات، لكن في نفس الوقت باعلن بصوت عالي إني باحب الويب، ومش بالومكم لو انتم كمان بتحبوه.