صورة تشبه لي

اترددت كتير قبل ما أكتب اليومية دي،لأن عمري في حياتي ما حسيت إني ممكن أتكلم عن بابا في حاجة ممكن يقراها مخلوق غيري. مكان بابا في قلبي له سرية خاصة. مخبأي اللي باستخبى فيه لما الدنيا تمطر، أو لما العيشه ماتكونش حباني. ومحاولة الكتابة عنه مهما كانت الكلمات حلوة، أكيد مش هتبين هو قد إيه وحشني.

من 10 سنين فاتو، خدوني من المدرسة وودوني عند خالتو وقالوللي مش هتشوفي بابا تاني. زعقت فيهم. ضربتهم. "إزاي ممكن تقولوا حاجة زي دي؟ أنا رايحه لبابا دلوقت"

ودلوقت، كل اللي فاضل صورته.. اللي حاطاها ف قلبي ومعلقاها على حيطة أودتي..
كل يوم أصبح عليه. أبص في المرايا وآخد بالي من عينيه الواسعة اللي تشبه لعينية تمام، وحواجبه التقيلة، وسمرة بشرته اللي ف نفس درجة وشي. بأكلمه وأقول له شايفني يا بابا كبرت إزاي؟ شفت إزاي بقيت أشبه لك؟ عارف؟ أنا قريت معظم الكتب اللي ف المكتبة بتاعتك.

أول يوم ف الجامعة.. أول برافو.. وأول مرتب..
كان نفسي يكون موجود. كان نفسي أجري عليه وأرمي نفسي ف حضنه وأقول له "فرحان بيا يا بابا؟"

بس مع إن مش فاضل دلوقت غير صورة.. بهتانة .. وبروازها مليان تراب، أنا حاسه إنه عايش جوايا.. بيوجهني. وبأفرح قوي لما ماما بتقوللي "إنت زي أبوكي بالضبط"..
أعمل إيه.. ما هو أصل صورته..
تشبه لي!