" الكارثة كلها بتبتدي بالكلمتين دول: دي مجرد صداقة بريئة، وبعدها بقى يبدأ الرجل أو الست يتكلموا في الشئون الخاصة بل وأخص الخصائص. وياريت الحكاية بتقف عند كده لأ ده فيه أزواج وزوجات بيخونوا بعض"

ويسألها المذيع: "الخيانة يا دكتورة؟"

"أيوه يا سيدي الفاضل الخيانة، مش بس خيانة جسدية –أستغفرك ربي وأتوب إليك- نعم يا ابني ده فيه خيانة بالفكر. يعني فيه أزواج وزوجات بيتخيلوا أنفسهم عايشين مع اللي بيسموهم "مجرد أصدقاء" بدل من حياتهم. وبتبدأ من هنا الخيانة لما تبقى عايش بجسدك فقط مع زوجك أو زوجتك وعايش بخيالك مع حد تاني. نفسك حد تاني يكون في الموقف ده بالذات معاك. وبعدين الزوج أو الزوجة أصحاب مبدأ "مجرد أصحاب" ياريت يحطوا نفسهم مكان شركائهم في حياتهم وهما هيعرفوا قد إيه بيتألموا".

وقعت عليها تلك الكلمات كالصاعقة لدرجة أنها مالاحظتش إن البرنامج انتهى، لكم تقدر هذه الدكتورة الجليلة وبتحرص كويس قوي على مشاهدة برنامجها على تلك القناة أسبوعيا. عمرها مافكرت في الموضوع بالشكل ده، معقولة تكون بتخون "علاء" جوزها.

"لأ طبعا أنا باستريح بس في الكلام معاه بحب آخد رأيه. الله بس أنا فعلا ساعات باتمنى إن "هشام" هو اللي يكون قدامي هيفهمني أكتر، هيحس بيّ أكتر، ده بيقول اللي أنا عاوزة أقوله بالظبط، ده احنا بنفهم بعض من غير كلام خالص".

"إيه يا خبر أنا بقول إيه "هيفهمني وهايحس بي وبنفهم بعض" ده نفس اللي الدكتورة قالته. أنا طول عمري ملتزمة ونقية إلى أبعد الحدود، الناس كلها بتقول عني إني وشي ملائكي وحتى صوتي ملائكي. وماحصلش إني في حياتي كلمت حد من زمايلي بالرغم من إن طول عمري في مدارس مختلطة لغاية ما دخلت الكلية وقابلت "هشام" وخلصنا جامعة سوا واتعينّا في شركة واحدة. وهناك قابلت "علاء" واتقدم لي ووافقت، أينعم كان زواجنا تقليدي بس أنا وافقت لأني طول عمري شايفة إن ده أنجح جواز، وفعلا احنا جوازنا ناجح وعندنا ولد وبنت. ياه أنا ماعدتش فهماني.. أنا عمري ماتخيلت "هشام" كزوج لي طول عمري.. بافكر فيه كصديق عزيز زي أخويا بالظبط، يمكن باتكلم معاه علشان ماعنديش إخوات رجالة."

من حقي يكون لي أصدقائي بس لو فكرت بمنطق الدكتورة يبقى من حق "علاء" كمان يكون له أصدقاء، بس ده معقول إنه يكون فيه حد بيفهمه قدي، لا يمكن....

مش معقولة أكون خاينة.. مش معقولة ده؟

ياريت حد يقول لي أنا فعلا كده خاينة ولا لأ؟