المؤثرون في الأرض

يا ترى تقدر تكون مؤثر؟؟.. يعني تقدر تأثر في الآخرين بشكل فعال؟.. لو تقدر يبقى بلاش تقرا العدد ده، لكن لو مش بتقدر أو بتقدر بس مش قوي يبقى لازم تقرا كل كلمة في العدد ده وكويس...

أهمية التأثير في حياتنا...

من الممكن إن ربنا ينفخ في صورة الواحد مننا ويبقى في يوم من الأيام مثلاً مخطط إستراتيجي من الدرجة الأولى... ولكن إيه فايدة المنصب ده لو ماقدرتش تقنع الناس بأفكارك الإستراتيجية؟... ببساطة شديدة جداً هتفضل أفكارك مجرد كلام نظري ليست له أية أهمية... وكمان ممكن تكون شاطر جداً في حاجة، لكن شطارتك دي تفضل محلك سر لو ماقدرتش تقنع الناس بالحاجة اللي إنت شاطر فيها...

نقول تاني:

علشان تتأكد من قد إيه التأثير مهم في حياتنا وبيمثل مهارة محورية في شخصية الفرد مننا تخيل نفسك كده في المواقف التالية من غير ما تكون عندك "قدرة التأثير في الآخرين":

1. عايز تطلب من رئيسك رفع المرتب.

2. عايز تقنع طفل صغير بإن دلوقتي ميعاد نومه.

3. عايز تطلب من عضو في فريق العمل اللي إنت مسئول عنه إن يحسن من أدائه.

4. عايز تقنع شريك حياتك بقبول أفكارك بخصوص مستقبلكما معاً.

5. عايز ترجع المياه لمجاريها بينك وبين شريك قديم حصل بينكم خلافات قبل كده.

6. عايز تفاصل مع البياع على تمن حاجة هتموت وتشتريها.

7. عايز تعبر عن وجهة نظر اتهمك الكثيرون بأنك مخطئ في تبيينها.

لو أخدت بالك كويس من الأمثلة دي هتلاقيها كلها بتعبر عن مواقف متعددة بنقابلها في الحياة سواء على المستوى العملي أو على المستوى الشخصي، ولو أخدت بالك أكتر هتلاقي إن المواقف دي كلها ليها تأثير على المدى البعيد فمثلاً:

لو قدرت تقنع طفل صغير بشكل دائم أن يذهب للسرير في الوقت المحدد للنوم في الحالة دي هتقدر تعوده على النظام اللي إنت عايزه، وزي ما قدرت على التأثير على الطفل فأكيد عندك القدرة على التأثير في مجال العمل مع العلم أن التأثير على الطفل أصعب بكثيييير