عندك دش؟!
بلاش..عندك وصلة الدش اللي تقريبا في كل بيوت مصر؟
جميل جدا..
بتشوف الجزيرة والعربية وأبو ظبي ولا مابتقلبش إلا على مزيكا وميلودي وروتانا سينما؟
ولا شوية من ده على ده؟
طيب.. شفت المظاهرات اللي القنوات الفضائية بتنقلها في كل حتة في العالم العربي تقريبا..
في لبنان وسوريا والعراق والكويت والسعودية.. ومصر..
بلاش دي..
مفيش يوم من الأيام كنت ماشي جنب نقابة الصحفيين ولقيت زحمة وهيصة وأمن مركزي وبشر وناس رافعين يفط عليها "كفاية" و"مش كفاية"؟
ما فكرتش تدخل في وسط دول أو دول.. ولاّ خفت؟
خفت..
ممكن يكون عندك حق لأن احنا عشنا سنين طويلة مانعرفش يعني إيه مظاهرات.. بل إن كلمة مظاهرة نفسها كانت بتخوفنا، وبتجيب لنا أرتكاريا "إيه أرتكاريا دي؟"

بس دلوقتي الوضع اتغير..
في السنين اللي فاتت كان صعب جدا تلاقي مظاهرة تخرج في الشوراع.. وكان المكان الوحيد اللي ممكن نتظاهر فيه هو الجامعة.. وده كان بيخلينا نسأل..
"طيب بعد ما أخلص الجامعة أتظاهر فين؟".
دلوقتي -وتقريبا من أيام حرب العراق اللي شهدت أكبر مظاهرة في ميدان التحرير- بقى من الممكن إننا نخرج في مظاهرات في الشوارع.. وكمان الموضوع ده ما عادش مقتصر على القاهرة وبس، بقى موجود كمان في المحافظات والأقاليم..

يعني فكرة المظاهرة نفسها بقت أمر واقع ومنتشر.. بس عاوزين نسأل سؤال..
هو احنا ليه بنتظاهر؟ وإيه فايدة المظاهرات أصلا؟
المظاهرة في الأول وفي الآخر هي تعبير عن موقف مجموعة معينة تجاه قضية محددة..
يعني مثلا أيام حرب العراق كانت لندن بتغلي بالآلاف من المتظاهرين البريطانيين ضد الحرب دي.. خروجهم بالشكل ده أثبت للعالم كله إن مشاركة بريطانيا في الحرب لا يرضى عنها كل الشعب البريطاني..
"بس يعني المظاهرات دي منعت الحرب على العراق؟"

لأ يا سيدي مامنعتش.. بس هي سجلت موقف الناس دول اللي طلعوا في قلب الحر أو في عز المطر عشان ما يفرطوش في رأيهم.. وبعدين فكر كده مين أحسن اللي بيطلع في مظاهرة يعبر فيها عن رأيه.. ولاّ اللي بيقعد في بيتهم كافي خيره شره ومش مشكلة الدنيا تولع بره بيتهم.. مايعرفش إن النار اللي بره ممكن قوي تدخل له جوه البيت؟

بس خد بالك الناس دي مش بتطلع المظاهرة عشان هيصة وبس، ومش بينزلوا شتيمة وتكسير في البشر والناس اللي قدامهم..لأ..
الناس دي بتطلع المظاهرة وهم لابسين أحلى هدوم عندهم.. كأنهم رايحين رحلة.. فرح.. هيقولوا اللي عاوزين يقولوه بكل شياكة وهدوء ونظام، وكل واحد يرجع بيته راضي عن نفسه كل الرضا..
وفي الدول الأوروبية "العالم المتحضرين الوحشين دول!"
دايما تلاقي رجال الأمن محاوطين المتظاهرين بحب وحنية وكأنهم خايفين عليهم من أي اعتداء من طرف تاني.. إلا في استثناءات نادرة..

في حين في مصر.. برضه تلاقي رجال الأمن محاوطين المتظاهرين بس مش بحب وحنية!
صحيح إنهم مش بيتعرضوا للمتظاهرين إلا إذا جات لهم أوامر بكده.. بس دايما تلاقي العلاقة بين المتظاهرين ورجال الأمن المركزي متوترة.. مشدودة.. كل واحد بيص للتاني بتحفز وقلق.. كل واحد بيص للتاني بقرف، ولسان حال رجال الأمن بيكون "إمتى الناس الفاضية دول يمشوا" ولسان حال المتظاهرين بيكون"هم الناس دول كاتمين على نفسنا ليه؟".. مع إن الاتنين في الأساس ولاد بلد واحدة ومصلحة البلد دي تهم الاتنين.. بس اللي بيحصل إن كل واحد بيتصور التاني عدو له..