|
الفرقة الإعدادية ـ أول يوم
الساعة السادسة صباحا
بابا باسني وقال لي لو طلعت الأول على الدفعة هاجيب لك الموبايل اللي إنت عايزه
 الساعة سبعة إلا ربع
دخلت الجامعة... حتى الحراس استغربوا كنت أنا ومحمد زميلي رايحين شايلين المسطرة حرف تي ولوح الرسم وكل واحد فينا بيغني أغنيتة المفضلة
أنا: يا صحرا المهندس جاي
محمد: عباس متأخر ع الجامعة وواخدها جري
الساعة التاسعة صباحا
اكتشفنا إن كان فيه محاضرة الساعة 8.30 والدكتور خد فيها غياب "محدش يسألني ازاي لأن ده اللي حصل والله"
بعد أسبوعين
اكتشفنا إن فيه حاجة اسمها "ميد تيرم" واكتشفنا إن ده امتحان... يا خرابي هنعمل إيه
في آخر السنة يوم النتيجة
أنا نجحت ومحمد سقط
دخلت قسم كهربا
وتوالت المفاجآت
سقطت أولى كهربا
دكتور "ملزق" حبتين شافني وأنا واقف في كلية آداب مع صاحبتي وفي إيدي سيجارة خد الكارنية وعلبة السجاير"مش عارف ليه" ولسه بشيل المادة بتاعته
تانية كهربا
عديت بمادتين
دلوقتي في الفرقة التالتة الكهربا
مفيش جيل... مفيش حريم... حالة توهان ماشية عليّ وعلى كل زمايلي... صعب إنك تفتكر اسمك الرباعي... لازم قبل ما تدخل الجامعة تتأكد إنك منزلتش بالبيجامة...
وأخيرا بابا حبيب قلبي بيحلفلي إني لو حققت أمنيته وجبت مقبول هيجيب لي عربية وهيخطب لي "هينغنغي من الآخر"..
يا ريت يا شباب أي حد في كلية هندسة يقول لي دي حالة عامة لكل طلبة هندسة ولا ده وباء منتشر في الكلية بتاعتنا احنا وبس... | 
ساحة النقاش