|
التطور الطبيعي للغيرة |
|
|
| |
|
خلونا نتفق على إن الغيرة موضوع مزعج جدا، وبإنها ممكن تحول الحب لجحيم حقيقي لو اتسابت من غير وقفة حقيقية. وقبل الوقفة دي، ممكن الكلام الجاي ده يساعدنا في التفكير شوية. الكلام مأخوذ عن دراسة لـ"وايت" 1981 و"برم" 1985. الدراسة دي بتعمل حاجة لطيفة خالص؛ بتوضح المراحل اللي بتاخدها الغيرة.. ازاي بتتصاعد.. أو -بمعنى أصح- ازاي بتتحول من مجرد غيرة عادية لكارثة حقيقية.
إنت بتقول عز؟؟ لما بتكون حاسس إن علاقتكم مش مستقرة، ولما بتكون بتعتمد على حبيبك بشكل كبير، إنت بتكون عرضه للإصابة بالغيرة. ممكن تشوف إن اللي حوالين حبيبك بيشكلوا خطر حقيقي على علاقتكم، مع إن ده عادة مش بيكون صح. وعادة لما بيكون في الأشخاص اللي حوالين الحبيب، شخص جذاب وناجح (إلخ إلخ)، بيكون التهديد أكبر للعلاقة.. أو بتعتقد كده يعني. باختصار بتكون ردود أفعالك زي "شويكار" في فيلم "إنت اللي قتلت بابايا"، بنستني نسمع كلمة "عز"، ونسيب الخيال يعمل الباقي! زود الطينة بلة: وعشان الأمور تزداد سوء، ممكن تتجسس على اللي بتحبه وعلى المنافس ليه في حبك (في خيالك طبعا)، ومفيش مانع من إنك تسهر الليل وتفكر "يا ترى كلمته؟" أو "ياترى شافتها صدفة في الشارع؟".. الحبيب بيغير الأول، بعديها ممكن يحس بالدونية (يعني تبتدي عقدة النص تنقح عليه).. أما الحبيبة، فهي بتحس بالنقص الأول، وبعدها تبدأ تغير (والعهدة ع الدراسة). اقلب الترابيزة: لو خلاص زودنا الطينة بلة بشوية شك، حان الوقت لقلب الترابيزة بالضرورة. وقلب التربيزة مش بيتطلب أكتر من الآتي: ● اتمسك باللي إنت بتحبه أكتر.. اخنقه في كل حركاته.. قول له هو قد إيه وحش وشرير عشان مش بيتصل يطمن عليك كل خمس دقايق. |
نشرت فى 17 مايو 2005
بواسطة anbaa1
عدد زيارات الموقع
647,263
ساحة النقاش