كل كلامك لينا أكيد بيكون م القلب..
يبقى أكيد هيمس القلب..
حالنا ده حالك..
كل ما فينا هيشغل بالك..
اكتب لينا.. وعلّي جوابك..
بكلام برضه أكيد م القلب..
يبقى أكيد.. هيمّس القلب…

  

زمان كانوا بيقولوا إن الحب الحقيقي بييجي لما الإنسان يتعدى سن 21 سنة؛ عشان يبقى عقل وقدر يميز بين المراهقة والحب الحقيقي، وناس تانية قالت لما يخلص الكلية عشان يبقى فاضي..

طبعا الحب بييجي فجأة ومش بيخضع لكل ده، بس فيه اللي بيقدر يموت الحب جواه لغاية ما يكمل 21 سنة أو يخلص الكلية، وأنا واحدة من الناس دي، بس للأسف بعد الفترة دي ما بتروح من العمر مش بيلاقي أبدا الحب اللي بيدور عليه..

كنت أتمنى أعيش قصة حب جميلة من الطرفين، وكنت باحلم بحياة لذيذة وإنسان يخاف عليَّ، بس أنا أجلت كل ده لحد ما أتخطب رسمي زي ما أهلي ربوني، وطبعا ده المفروض كان يحصل بعد ما أخلص الكلية ولكن اتخرجت واشتغلت بقالي 5 سنين، ولا لاقيت الحب الحقيقي ولا عشت لي يومين حلوين.. أنا مش عاوزة حل لمشكلتي لأني عارفة إن كل شيء قسمة ونصيب، أنا بس حبيت أفضفض وأسأل أنا غلطت لأني كنت باقتل أي مشاعر تتولد جوايا وأنا في الكلية؟ تفتكروا إني ضيعت أجمل أيام عمري فعلا؟ على فكرة أنا حاسة إن الزمن اتغير وماعادش له قواعد زمان، ماعادش زمن الالتزام وإن اللي مالهاش علاقات تكون ملاك، بالعكس بقى اللي لها علاقات كتيرة هي اللي بتبقى حلوة وكويسة والحياة بتفتح لها دراعاتها.. ده اللي أنا باشوفه قدامي في كل مكان، تفتكروا أنا كنت فعلا غلط، أنا حاسة إن حياتي بتتسرق مني وحلمي بيضيع.. جوايا حاجات كتير قوي اتكسرت.. أصعب حاجة في الدنيا لما تحس إن كل شيء حواليك بيروح، حتى الأمل بيضيع، والحلم بيتحطم ويتوه، وتبقى زي الريشة في بحر كبير الموج بيطوحها وهي مستسلمة للأقدار.. ..............