إحساس بغيض
محمد ضباشه
عضو اتحاد كتاب مصر
إحساس بغيض
أنك تغيب عن حضن دار
دون اختيار
فيها العوار زي العَلَمْ
فارشة الملاية للكبار فوق السحاب
والباب فولاز
حبة إزاز متكسرين تحت القدم
والخطوة بتمد لورا
تفضح غياب
كل النجوم الساهرة بالفشخرة
ويا القمر اللى أمر
يقتل رضاك
وحلم بيلف البلد زي العبيط
فوق الغبيط إنسان ما فيش
مش لاقى ضوء
أو ماء وضوء يغسل ذنوب اللى افتروا
واللى بيدفن فى البشر
من غير وفاة
إحساس بغيض إنك تشيط
من نار هوس ماسكة الزمام
كل الحرام أصبح حلال
وابن الحلال ناقص علام
يفهم كلام زي الكلام
من غير لجام
يرميه هنا من غير إمام
جوه البوار
يشرب غناوي مكرهم
ياكل فتات
يهضم حاجات زي الحجر
وينام على فرشة أمل
زي الحمار
