اولا : نبذه بسيطة و مختصره عن الاركت .

هو فن تفريغ الخشب طبقا للاشكال المطلوبه بالرسومات المصممه و بالمقاييس المحدده لإخراجها فى شكل جميل يتناسب مع المكان الملائم لذلك .

ثانيا : الاركت بين الفن و التجارة .

نااااادرا لما تلاقى حد يعرف الاركت و ان كان يعرفه فمعلوماته ضئيله و فقيره جدا عن المجال ده عشان كده اللى بيهتم بيه بيهتم بيه كهوايه و تسليه و شغل لوقت الفراغ يعنى يقعد يعمل بيه تابلوه او يجيب صور و يلزقها على خشبه و يفرح جداا لما يلاقى الصوره مجسمه على الخشب قدامه ... عشان كده الاركت بقى فن مهمل و تجاره معدومه فى السوق سواء السوق المصرى او العربى او العالمى لان كله دلوقتى بيبحث عن الصناعه الجاهزه و السهله و اللى اسعارها غاليه جداا مش اى حد يقدر يقتنى لعبه لاطفاله تحمل الاسعار دى و كمان احتكار لشركات محدده فروعها محدوده داخل القاهره و المحافظات ..

الشغل فى الاركت الفنى ... اذا قررت العمل فى الاركت الفنى فاحرص على ان تكون بضاعتك ذات جوده ممتازه بل اعلى من الممتازه .. ليييه ؟؟ لان السوق مليان بالمنتجات الجيده الصناعه لانها بالمكن لكن مفهاش روح الابداع او الفن و عشان تنزل بمنتج فنى لازم يكافئ المنتج ده فى الجوده اولا و يتفوق عليه فنيا ثانيا .. ده بالنسبه للاركت الفنى و دى نماذج للاعمال الفنيه للاركت .

ثالثا : ايه المطلوب منك عشان تشتغل اركت ؟؟

الاركت صناعه مش بتحتاج ادوات كتير كل اللى ممكن تحتاجه
ادوات ثابته
دايما معاك و المتمثله فى منشار اركت يدوى سعره بسيط لا يتجاوز ال 15 جنيه هو سعره اقل من كده بكتير على فكره على حسب خامته بس يفضل نوع تقيل عشان يستحمل و البنسه او الزرديه و دى عشان الضغط على صواميل المنشار و ربط السنون و مسمار صلب و مسمار عادى و جاكوش صغير.. و اذا حبيت تعمل شغل حرق يبقى هتحتاج مكواه لحام ذات سن رفيع .. دول حاجات ثابته دايما معاك .

رابعا : الاسطمبات و انواعها
الاسطمبات او الفورم او الماكيتات كلها سواء حاجه واحده مفيش اى فرق غير فى المسميات
للاسف الحاجات دى غير متداوله بشكل كافى بس ممكن تلاقو منها كتير حوالى 100 نموذج فى الكتاب اللى قولتلكوا عليه فوق ده و ممكن تصنعوها بنفسكوا
الاسطمبات دى بتختلف من حيث النوعيه و التركيب يعنى مثلا ناخدهم حاجه حاجه كده و هتكلم فى حدود خبرتى انا عشان مبحبش اتكلم فى اللى معرفش فيه ...
نوع من الاسطمبات بيكون للمعلقات و ده ممكن التشكيل فى كل جوانبه سواء بالتفريغ او البروز و ممكن يتعمل شكل واحد ثابت و ممكن يتعمل اشكال منفصله متصله بالحلقات و ده بيكون غالبا اما ساعات او براويز او مرايات او معلقات مكتوب عليها ايات من " القران الكريم " و سوقها متداول لكن نادرا لما تلاقى حاجه هاند ميد و مصرى كله بيجى من بره و بيكون مكن و الصين طبعا رائده فى كل المجالات دى زى ما الكل عارف .

خامسا : ابدأ و اتعلم و اتقن قبل ما تنزل السوق

عشان تنزل السوق و تبقى واثق من نفسك لازم تتعلم كويس اوى ازاى تمسك المنشار و ازاى تتعامل معاه و ازاى تتعامل مع الخشب ممكن تقعد تتعلم اسبوع لكن تأكد انك عشان تتقنه مش قبل شهر عشان تكون ايدك اتعودت على الخشب باشكاله المختلفه و كمان عشان تكون بدأت تتفادى كسر السنون ...
انا حاولت ادور على فيديوهات تعلمكوا ازاى تمسكوا المنشار و ازاى تتعاملوا مع التفريغ لكن للاسف زى ما قولتلكوا فن الاركت ده فن مهمل و محدش مهتم بيه الا قليل اوى و ملقتش غير العشر دقايق دول ممكن ينفعوا هما على اليوتيوب اعداد اتنين مدرسين تقريبا فقدوا الامل ان حد يتابعهم وقفوا لحد كده و بس .