بموت منها
احمد صبري
انا اللي عيشت سنيني
احفظ غناويها
وكل ما تكرهها عيني
كل ما اغضب عليها
قلبي يصحيني
يقولي وهي مالها
ازاي هتمشيني
وهي واقف حالها
بموت منها
وكنت زمان بموت فيها
ماليش غيرها
اما هي
كتير ليها
ونسياني وبيعاني
وعاملة ان انا ناسيها
ومظلومة وظلماني
ومهزومة وكسراني
وكل مافيها خلاني
اكره ايامي وسنينها
بموت منها
وانا اللي مشيت شوارعها
على رجلي
انا اللي عمري مايوم هبيعها
عشان اهلي
علموني ان الظلم دا قدرها
والسجن والموت والحياه
مش باختيارها
هية كده وخيرها تاه
بين شرها
الكدب مالي شاشتها
طول عمرها
فرعون يبهدل اهلها
والخوف تملي يذلها
وناس تطاطي لاي واطي
والخيانة في دمها
بموت منها
وكلمة حق بكتبها
انا اكتر واحد حبها
وبدعي الله يعينها
ويرحم اهلها
وتتغير وتتحرر
احس في يوم بعيدها
بالحرية تتعطر
وتبطل تمد ايدها
وياريت بتشحت علينا
كله في كرش الحيتان
بيبيعوا ويشتروا فينا
وده حالها من زمان
حتى الغنوة اللي هديتها
في ثورة كنت بحبها
لو كنت عارف اخرتها
لا غنيتها
ولا
كتبتها
ويقولولي سيبها وارحل
هو الرحيل ببلاش
هو اللي يسرق واللي يقتل
زي اللي ما خانهاش
ادي الغنوة بموت
كلمة وتلحينها
بس خلص الصوت
انتهى في حينها
بموت منها
احمد صبري
بموت فيكي كلماتي والحاني وادائي
تحياتي احمد صبري
