إسم القصيدة ( رسالة زوج ) ...ردا على قصيدة( رسالة أم )

*********************
دموعك غاليه على قلبى
ياروح قلبى
وآهاتك فى عز الليـــــــل
بتوجعنى
وبتألم وأنا حاسس بنار قلبك
بتلسعنى
وبأعمل إنى مش شايف
ودمعة عينى تفضحنى
*****
ماهو كله على يدك
بنعمل كل مابنـــقدر
ولا بنحرم ولا نقــصر
ومهما بندى وندادى
يقول برضه عايز أكتر
وبنربى وبنكبر
وهو علينا يتكبر
ومش عاجبه الكلام منا
وبالعيشه بيستهتر
ويفــــرح لمـا نتكدر
*****
وأقـــــولك إيه ...
ورب الكعبه هيجيـــلك
يبوس رجلك ويشكيلك
يقولك ياأمه سامحينى
عرفت الحق دلوقتى
وإن رضاكى رضا ربى
فى حضنك ياأمه خبينى
من الدنيـــا وقســــاوتها
وحطى إيديكى على راسى
وإرقينى
وزى ماكنتى وأنا عاصى
بتدعيلى
عشان خاطر تسامحينى
وساعة الفجر إدعيـــــلى

( بقلم/ علاء الدين فؤاد زايد )