تقرير مازن الصبروت

فكري صالح، هو مدرب خلوق ومتواضع رغم أنه شيخ مدرب حراس المرمي، بدأ عمله موسم 1980 كمدرب حراس للمنتخب الوطني، وكان عمره وقتها 24 سنة تولى تدريب حراس المنتخب الأوليمبي والشباب والناشئين ومنتخب النساء وعمل لفترة طويلة مع الجنرال محمود الجوهري، وتخرج على يديه عمالقة بحراس المرمي مثل إكرامي الأب وإبنيه الراحل أحمد وشقيقه شريف، وأيمن طاهر وعادل المأمور وطارق عبد العليم وعصام الحضري وعبد الواحد السيد ومصطفى كمال وسطوحى ومحمد عبد المنصف وعلي لطفي وأبو جبل وأخيرًا أحمد الشناوي.

بداية كابتن فكرى اهلا بيك . كلمنا عن بداية حياتك العملية وكيف بدأت؟

أنا كنت بلعب لنادى الزمالك كحارس مرمى وسبت النادى لظروف حرب 73 وبعد الحرب ما خلصت رجعت لقيت اشرف ابو النور رجع وكمان سمير محمد على وهشام عزمى ودول الثلاثه اللى هيتسجلوا وانا بره النادي، روحت على الترسانه ولقيت حسن على وانا معاه ولما لقيت نفسى احتياطى سبت النادى وقررت مش هلعب تانى خالص.

ولما كنت قاعد فى نادى الجزيرة لقيت كابتن محمود معروف بينادى عليا ومعاه فؤاد صدقى وبيعرض عليا العب لنادى المقاولين وكان اسم المقاولين مش معروف نهائي وحبيت العب عشان اثبت للزمالك انه خسرنى.

وكانت المفاجأة إنى الاقى كابتن فؤاد صدقى بيقولى انا شفت رؤية فى المنام ثلاث مرات انك هتبقى مدرب حراس مرمى كبير وانا فى قرار نفسى عاوز  ألعب مش عاوز ادرب وروحت لكابتن عبد المنعم الحاج قالى نعم مينفعش الكلام ده انا عاوزك فى حراسة المرمى يالا على التمرين.

وإذا بالمفاجأة كابتن فؤاد صدقى يقرر فى اجتماع اللى بعد التمرين امام الجميع انى مدرب حراس المرمى والاقى كل زميلى فى الملعب بيهزروا وبيغنوا ( فكري بقى مدرب ..) وطلب منى فى اليوم التانى اكون فى الملعب ... ولاول مرة احضر للملعب قبل التمرين بخمس ساعات واجلس بمفردى فى انتظار كابتن فؤاد صدقى عشان اقوله اعمل ايه مش عارف واذ بى ادخل الملعب لما الكل حضر ما عدا فؤاد صدقى واقول دعاء للخالق عز وجل وأجد نفسى اجهز للتدريب وانا لا ارى احد فى الملعب سوى ما اجهزه للتدريب ونظرت حولى لاجد كل من فى الملعب ينظر لى ويتعجب كيف تعملت هذا لاننى جهزت اشياء جديده فى عالم التدريب .. وكانت البداية .

كلمنا عن حياتك العسكريه وهل كان لها عامل فى نجاحك ؟

ده اكيد انا دفعة الكلية الحربيه اللى هى مصنع الرجال وبتخرج الانسان المنضبط مش المقصود بالانضباط هو الحفاظ على المواعيد لا ابدا انما بتخرج انسان فيه كل سمات الالتزام والثبات اللى تساعد اى شخص على النجاح فى حياته بتوفيق من ربنا قبل كل شئ .

نحب نعرف اهم محطات نجاحك العمليه فى مشوارك الرياضى واهمها ؟

المحطات فى حياتى كتيره وكلها قدريه بدء لما كنت ملازم اول وعمرى 18 عام وده قدرى ان دفعتى اتخرجت بعد سنة وثلاث شهور لظروف استثنائية واحب اقولك سر انى كنت بدرب اكرامى وثابت البطل وسطوحى وعادل المأمور وكان اكرامى اكبر منى بشهرين وثابت اكبر بسنتين وفى الوقت ده مكانش باين نظرا لانى كنت فى الوقت ده كنت نقيب صاعقه ومتميز بدنيا وكنت بلعب فى الزمالك وانا ملازم اول تحت 18 سنه وكان اخر مرة لعبتها مع نادى الزمالك كحارس مرمى يوم 1 رمضان 73 وكنا بنلاعب نادى الطيران وكسبنا  6 – 1 وخرجت من المباراه مباشرة وكانت سيارة الجيش فى انتظارى ولتكون حرب 73 بعده ب 9 ايام ونفس الشئ مع كابتن حماد امام وكابتن عفت . محطه اخرى فى حياتى كنت اول مدرب رسمى لحراس المرمى للمنتخب لان قبل كده مكانش فيه حاجه اسمها مدرب حراس مرمى مع عبد المنعم الحاج .

وانا من ابتداء من سنة 80 اديت فرص لظهور عدد كبير من الحراس مش اهلى وزمالك بس على سبيل المثال ( اكرامى – ثابت – المامور – حليمو – سطوحى – على النجار ( اولمبى ) – عجيبه ( طنطا ) –  عبد الرحمن مسلم وعلاء خليل ( المقاولين ) وكان على النجار اكبر منى بعشر سنين .. ومحطة مهمه جدا عندما اسند لى سيادة المشير ابوغزاله قيادة المنتخب العسكرى لاكون مديرا فنيا.

وكنت الاول على افريقيا 86 وكنت بداية ظهور المنتخب العسكرى على الساحه الدوليه على يد العبد لله . وكان وقتها معايا فى حراسة المرمى شوبير .

ومحطة ثالثه مع كرول  وعملنا شغل كويس اوى وكنت وقتها ماسك جميع المنتخبات الاول والاولمبى ووقتها كان المنتخب الاولمبى مع كابتن هانى مصطفى وطلعت وقتها الحراس دول

الحضرى – مصطفى كمال – غريب حافظ – منصف – عبدالواحد السيد – يوسف طاهر- ممدوح ابراهيم – يونس .

محطة منتخب شباب سكوب خرجت من تحت ايدى ( الشناوى – على لطفى – محمود شكرى – البشبيشى – بسام – ابو جبل ) ووقتها كانت الصراعات ياترى مين هيلعب على لطفى ولا ابو جبل .

هل كان للكابتن محمود الجوهرى الله يرحمه دور فى ظهورك على المستوى الدولى والمنتخب ؟

طبعا ودى المحطه المهمه جدا وهى محطه كابتن محمود الجوهرى الله يرحمه جنرال الكرة المصرية ورغم انى اشتغلت مع مدربين كتير انما كان بينا كيميا عجيبه ومع بداية شغلى معاه جه وقت وقالى انا بديك كل الصلاحيات فى شغل حراس المرمى دون تدخل منى انت يا فكرى حاجه تانيه غير اى حد اشتغل معايا قبل كده .حتى ان موقف فى الاردن شاركت حارس فى نادى درجه تانيه بدلا من حراس عمالقة الاردن اسمه شفيع وكابتن الجوهرى يذهب عنى ثم ياتى ويؤكد عليا ويقولى يا فكرى انت متاكد انك هتلاعب شفيع ده وقلتله ايوه يا كابتن وكانت المفاجاه انه يتالق . وعملنا مدرسة حراس مرمى تحت رعاية الامير وكانت الاولى والفريده من نوعها.

ما هي قصة ظهور ايمن طاهر؟

بلاعب المحله فى المحله والمامور اعتذر ومفيش الا طارق عبد العليم وجبت ايمن طاهر من الناشئين واشركته بعد ما اعتذر طارق للاصابه واديت الفرصه لايمن والكل كان خايف وربنا وفقنا وكسبنا وكل الجماهير انتظرتنا قدام النادى ورفعتنا على الاعناق .

وماذا عن قصة عصام الحضري وكيف اكتشفته ؟

قصه غريبة طالع من الاتحاد قابلنى مدرب دمياط قالى انا عندى حارس لو شفته مش هتسيبه وقلتله عن اقرب مباراه عشان اشوفه قالى الخميس مع المنصورة وروحت شفته وكتبت اسمه ضمن العشر اسماء فى المنتخب مع كرول وبدء يجتهد ويخلص فى التدريب وكانت الحرب ضدى فى كل وسائل الاعلام علشان فضلت عصام يلعب ويبقه مصطفى كمال حارس الاهلى احتياطى والكل يقول ازاى يسيب حارس الاهلى ويجيب واحد من دمياط واصريت ان عصام يلعب وكرول كلمنى وقالى على مسئوليتك قلت ايوه والمفاجاه ان بعد تالق عصام ياتى عدلى القيعى ويتعاقد مع الحضرى .

هل مصر بحاجه مرة تانيه للاستعانه بحراس اجانب امثال انطوان بل الذى ترك بصمه كبيره فى حراسة المرمى فى مصر وافريقيا؟

لا ابدا احنا عندنا خامات كويسه جدا ومحتاجه بس التوجيه الصح ويكفى ان فى المغرب ظهر الشناوى بمستوى لم يصل له حتى الان وانبهرت به جماهير المغرب كلها .

متى نرى حارس مرمى مصرى محترفا فى اوربا ؟ وماذا ينقصه ليكون محترفا؟

صعب جدا لان اللاعب المصرى لايتحمل الانضباط الاحترافى واحنا مش عندنا تربية النشئ الاحترافى وعندنا نماذج قليله نجحت زى عبد الظاهر واحمد حسن انما الحارس يختلف لان مش عندنا الفكر الاحترافى من الصغر.

بماذا تنصح اى شاب يريد ان يكون حارس متميز وهو فى بداية حياته ؟

لازم الاول يكون عنده موهبه لان اى لاعب فى اى مركز ممكن يلعب وبالتدريب ينجح الا حارس المرمى وراس الحربه لانهم محتاجين لموهبه واقل طول له 182 سم علشان يكون عنده مقومات .

حضرتك انشأت صفحة على الفيس بوك به كم فيديو كبير من كل تدريب تقوم به ما قصته ؟

انا ربنا ادانى العلم ده والخير ده مش علشان اكتمه او اتاجر بيه انا عامل الصفحة دى عشان كل خبراتى على مدار 40 سنه احطهم فى مدرستى التى اهبها لوجه الله تعالى . وكل واحد عاوز اى معلومه يدخل ويشوف نماذج كتير من تدريباتى وانا بتعب جدا عشان اصور ده وعشان كمان ارفعه على الصفحه انما فعلا لا احب ان اتاجر بنعمه اعطانى اياها ربنا سبحانه وتعالى ...وهذه المدرسة مفتوحه للجميع بلا قيود .

f