الأديبة الشاعرة : فاتن متولي إحساس فظيع لما تبص الصبح جوه مراياتك تنكش وتدور فوقك تحتك وراك ..قدامك أو حتى فى ضهر الأحلام مستنى هناك مبتحلمش.. تفتح أدراج الأفكار المتحاشه زمان مستنى تطلع روحك مابتطلعش تتخبى ورا عضم الخوف جواك وحلاوة روح بتحاول تلحق ضل خيال فى براح الكون المليان تباريح بوعود خايبه وأحلاااااااااااااام دايبه تتنتور أفكارك بتحاول تلقفها فبتنزل تحـــــــــــــــــــت وبطعم شياط الأسفلت بتطلع غيظ وعناد وتحس الدنيا كلها ضدك ومعانداك.. عارف حســــــــــاك خايف زى الفار المبلول بالضعف.. بتنشف روحك .. مسنود على حيطة الممكن والمفروض برطوبة وناشعه فى ديل العبط المربوط.. بسلاسل بكرة الجاى فى فرااااااااااغ الكون المليان بالزحمة بتحاول تحجز لمكانك قدام.. فبترجع تتسرسب كل الأسباب المحطوطة بخريطة عجزك وسكوتك. ورضاك المقسوم فى خانات مكتوبة بنفس الأفكار المطروحة على طرابيزة الواقع.. مرسومة خطاوى متحدد فيها طريقة دبحك كل صباح وبجسمك بتعيش.. رغم إنك مش أكتر من صورة ومكوسة فى مراية الحمام..!!
