كتبت /لولا محمد ابو الجنب

سمعت مره لداعيه ان من ضمن ابتلاءات ربنا للانسان انه يخليه يشوف الي ظلموه بيعلو وهو حالته بتبوظ يعني تلاقي الظلم عمال يمسّك والي ظلموك عمالين يعلو ف مراكزهم وحياتهم تحلو وتتيسر وانت عمال حياتك تبوظ من كل ناحيه وحالتك تتدهور ف تشك ساعتها ف عدل ربنا .. وتقول ازاي ف عدل اذا كان هو بيهني الي ظالمني وبيبهدلني انا وتبدأ تفقد ثقتك ف قدرة الله وعدله وتشكك انه بيحكم بالعدل .. ويبدأ الشك يدخل قلبك ويقتل يقينك بالله خلي بالك ده مش بلاء .. ده ابتلاء .. اختبار صعب شويه وقاسي بس لو مليت قلبك يقين بالله مش بس هتشوف حقك وتشوف الي ظلموك واذوك بيتبهدلو انت كمان هتشوف عوض ربنا فيك وهتشوف زي ماانت وثقت فيه ف اصعب وقت وف اكتر وقت كان بيضغط عليك فيه عشان يختبر حبك ، هتشوف ازاي كافئك بحبك ويقينك فيه ده حكى الداعيه عن موقف لبنت اتخطبت واتأذت من خطيبها وسابته بعد اذيه وظلم كبير وفضلت هي سنين تعبانه ومتبهدله وعماله تشوفه متحوز ومبسوط وكإن ربنا بيكافئه .. كانت قربت تفقد ثقتها ف الله .. بس لما صبرت واستعانت بيه ربنا عوضها عوض كبيييييير ووراه حكمته من ورا ده كله ووراه البهدله الي الشخص ده شافها وازاي لو هي قعدت ١٠٠ سنه مكنتش هتعرف تاخد حقها بالطريقه دي الظلم حوالينا ف كل مكان وتفشى بشكل خاص وبشكل عام .. خلي يقينك بالله ومتخليش الشيطان يضحك عليك وتبطل تصدق اسم من اسماء الله الحسنى انه "العدل" . "ان عوض الله إذا جاء .. انساك ما فقدت " .. اللهم اجعل يقيننا بك وحدك