قرقش فى سنانك
عض لسانك
و اقفل بابك
و اخرام الشبابيك
و اعمل كل حيطان الدار
سراميك
لمبات النور
خليها نيون
علشان فواتير الكهربه
والشمس فى لوحه زيت
جواك مخنوق
و رماد احلام
محروق
مش فاضل غير كام حرف
و كلاب عماله بتنهش فيك
و النوم متشعلق
خايف من الكرباج
و الحلم فى ركن البيت
مرعوب
خايف من عفاريت الليل
ماسكين فى ايديهم
طوب
و الريح بتهز الباب
و تدق فى نن عينيك
الخوف
حواديت بنشوفها
فى قلب الضلمه
و لحد ما يحى الشاطر
بحصانه
وعصايه موسى
و يدو ب الليل
على باب الفجر
و تزقزق عصافير التوت
كلنا بنموت
و بنرجع ويا الشمس
قرقش فى سنانك
عض لسانك
و اقفل بابك
اخرام الشبابيك
