ايدك فوق راسى
رجلك فوق كتفى
و عينيه البظه
من النفس المقطوع
... و الحلم المتشعبط
فى دباره
ادينى اماره
ع رأى المثل الشعبى
لو حظ قيراط
و لا كام فدان
مزروع بشطاره
و العرق النازل
عامل فوق جلدك عازل
الصوت المبحوح
بيفكرنى بفرخة
جارى المدبوح
و استنى الليل
علشان سلطان النوم
و الكفت احلامى فى حضنى
ع الفرش المليان مسامير
و الحيطه المدهونه بجير
مش بس لوحدى انا فى الاوضه
انا سامع زن الدبابير
و لحد ما عينى تغمض
تنزل كوابيس
مع انى قفلت الباب
بالترابيس
مش فاضل غير وشك و مرايا
و الجرخ الساكن جوايا
كان نفسى اشوف الصبح
بيخرج من تانى
ع فين وخدانى
و صحيت ملقتشى الا انى
فوق كفك ميت
مع انك خنقانى
وفى اخر صفحه
زورى كام صفحه
علشان ما تعيشى زمانك
واضحه
وحياة ضهرى المخسور
و عيني العاجزه عن الشوف
و لسانى الى مكسر حرفه
امسكى و فى اخر ضى
علشان يفضل شىء حى
نزرع بيه الارض براح
انا نفسى ارتاح
و انام لو حتى
مفتح عينى
