فى أول زيارة بعد الثورة
شكلك يا مصر اتغير كتير
شكلــــــك يـا مصر اتغير كتير وأصـــبح هواك يرد العليـــــل
سلامتك يا سمرا سلامة ولادك سلامة حدودك سلامتك يا نيل
هــــى ملامحك هــو جمالـــــك غايــــب وتايه بقاله ســــــنين
فينك يا غالية فين ابتسامتـك يــــــلا بقـه وكفايــة أنـــــــين
يلا يا طاهـرة انسى دموعـــك انسى عذابك وانسى همومــك
انسـى عمايـل شلــة خونـــة قتلـوا الفرحــة ف نن عيونــك
احلـف إنى ما كنتش شايفــك لا كنــت بـلادى ولا انا ابنــك
وكنت أقولها هى دى مصـر بلد النيـل والخيـر والنصـر
شكلـها عامـل زى الغولــة تنهش فينـا بايدهـا الشولـة
وإيدهـا التانيـة تهــرب بـره ما خلـت حاجة حتى الفولة
جاى من قبلى وشفت الصحرا كإنـى بشوفهـا لأول مـــرة
شعاع الشمس بيحضن رملك كأنه بيحكـى حكاية مجـدك
ولما وصلـت محطـة مصـر شفت عروسة وجنة وقصر
أول مــرة أشوفـــك كلـــك كده على بعضك طبق لأصلك
من غير صورة تبين شكلك حلوة وإنت الحزن ف دمك
شوفتك بدر منور أرضه يرسم صورة لحبى وحبك
شوفت الهرم الأكبر فوق فوق ف العالى قاتله الشوق
يرجع يروى حضارة بلـده بعد ماكان مكسوف مخنوق
رحت أزور ميدان الشهـدا خدنى ف حضنه وطلع دفتر
كاتب فيه أيامـه الصعبــة يوم ورا يوم برصاص العسكر
شاور بإيـده شمال ويميـن وملامح حزن عليه وأنين
خلـى دموعـى تقرا افكـاره قريـت الفاتحة وراهـا يـس
همس ف ودنى وقال لى حكاية حكاية شعب صبور للغاية
داق الغربة ف بلده سنين وصورة تجيبه رافع الراية
لكــــن لمــا أراد المولــــى وف بطن السمرا صرخ مولود
عاوز أنـزل يامـه سعيـد أوحتى أموت ع الأرض شهيد
قمـت لبسـت البدلة الحـرة ورميت البدلـة السودا المـرة
خدت اخوانى الشرفا ف حضنى ورسمنا لمصر اللوحة الحرة
ودعته ورحت أبوس ف ترابه اللــى رواه الــدم الغالـــــى
ورجعت أقول لولادى وأهلى مصـر بلدنـا بقـت ف العالى
المصدر: الشاعر جابر عبدالعليم عضو اتحاد كتاب مصر
نشرت فى 1 أكتوبر 2011
بواسطة akhbar
شبكة ساقية دار السلام الإليكترونية
تسجيل الدخول
ابحث
عدد زيارات الموقع
66,692