الكلام ده من القلب ومن اللى اتعلمتو من الثوره

لما شوفت على النت اللى بيحصل فى شباب الثوره من ضرب واهانه بصراحه اول مره خوفت بس بعد كده فكرت ليه انا خايف وهفضل اخاف لحد فين العمر واحد والرب واحد محدش بيموت ناقص عمر فقررت انى انزل بس طبعا مقولتش عندى فى البيت انى نازل عشان محدش يقلل عليا نزلت اول مره انا واصخابى يوم 28/1/2011 كان يوم جمعه الغضب كانت من المعادى وعدينا على المطبعه ودار السلام وكنا بنقول يا اهلينا خليكو معايا الحريه لينا وليكو شوفت ناس فى البلكونات دخلت تلبس وتيجى معانا وناس بتعيط عشان مش عارفه تنزل وناس كانت بتدينا مياه واكل كلو كان بيعمل اللى يقدر عليه المهم مشينا من المعادى وعدينا على قسم المطبعه وبعدين دار السلام وبعدين قسم مصر القديمه كنا مشيين بنهتف مش هنخاف مش هنطاطى احنا كرهنا الصوت الواطى ومغلطناش فى حد ولا كسرنا حاجه وبعدين وقفنا على كوبرى الملك الصالح عشان الناس تصلى وبعدين مشينا لحد ماوصلنا القصر العينى ومن هنا بدات !!! مش عارف اقول ايه المعركه ولا ايه !! لقينا كان فى ناس زيينا موجودين هناك كانت الشرطه بتضربنا بالقنابل المسيله للدموع لقين الناس بتقولة خد بصل عشان تشمو واشترى بيبسى عشان عينيك اول مره فى حياتى اغسل وشى ببيبسى اول لما كنت فى الاول مع المتظاهريين والشرطه ضربت القنابل المسيله للدموع لقيت عينى مره واحده معرفش حصل ايه قفلت ومش شايف حاجه جرييت على بره عشان اتنفس واغسل وشى مع انى مش شايف حاجه ولقيت الناس بتساعدنا واللى بيدينا بيبسى واللى معاه قطره عشان العين فعلا كان شعب مصر كلو ايد واحده وبعد كده دخلت تانى محرمتش والصف الاول كان فى رجاله مصر اللى كانو بيعملو المولوتوف وكانت الشرطه واقفه فوق اسطح العمارات بتضربنا بالقنابل من فوق وفضلنا على كده لغايه الساعه6 وبعدين الشرطه انسحبت ومع اخر قنبله اتضربت جت فى اخويا فى رجليه بصراحه خوفت وقلت لاصحابى كده كفايه يالله نمشى مش عايزيين حد يتصاب تانى ومشينا ومدخلتش التحرير ساعتها وبعدين حصل اللى حصل وعرفنا ان الشرطه طلعت المساجين وابتدينا نعمل كمايين ونحمى بيوتنا وكانت الناس الكبيره فرحانه بينا قووى وبيدعولنا فى المساجد وكنا بنتابع خطاب الرئيس وكنا كل يوم بنبقى اجمد من الاول انا فاكر اول يوم كمين مسكنا حوالى 7 حراميه منهم 3 مساجين من سجن ابوزعبل ايه اللى جابهم المعادى الله اعلم