كلمات / صلاح جاهين - الحان / سيد مكاوي
أوبريت #الليلة_الكبيرة .. كاملة
قبة سيدنا الوالي دي نوروها
محلا البيارق و الناس بيزوروها
قبة سيدنا الوالي في الجو عالية
محلا البيارق لما نوروها
حمص حمص دا اللي ماينقص
عمال يرقص يرقص و يقول
اللي شاف حمص و لا كلشي
حب و اتلوع و لا طالشي
بسترك هات حبة بقرش
ها ها ها ها ها ها
حمص حمص حمص
إسعى إسعى إسعى إسعى
خدلك صورة ستة في تسعة
إسعى إسعى إسعى إسعى
ياسي عجورة النار خسعة
الله الله الله الله
عجمية باللوز طعمية أراجوز
اليلة الكبيرة يا عمي و العالم كتيرة
ماليين الشوادر يابا في الريف و البنادر
دول فلاحين و دول صعايدة
دول من القنال و دول رشايدة
يا حضرة الأراجوز قولي
نعم يا عمدة عاوز إيه
منين يروحوا لمتولي
إمدح نبينا و صلي عليه
اللهم صلي عليه
تمشي كدة على طول على طول
لحد ما تلاقي عمارة
تكسر يمين تلقى بتاع فول
دكانته على ناصية حارة
تدخل يمينك و شمالك
شارعين و في التالت تكسر
شارعين و في التالت أكسر
على اليمين واخد بالك
وتمشي على طول تتمخطر
وأمشي على طول و أتمختر
تفضل كدة تمشي و تلف
وتخش من مطرح ما طلعت
وأخش من مطرح ما طلعت
ولما تلقى مقلة لب
تعرف بإنك توهت و ضعت
دي وصفة سهلة قوي قوي
دي وصفة هايلة قوي قوي
مع السلامة مع السلامة يا ابو عمة مايلة
فتح عينك تاكل ملبن
فينك فينك تاكل ملبن
إوعى لجيبك لا العيب عيبك
قرب جرب نشن وسطن إيدك و سطن إضرب
يحميك يا بني تبقى غالبني
قرب خدلك حتة ملبن
فريرة للعيل
يابو العيال ميل
خدلك سبع فرافير
زمارة شخليلة عصفورة يا حليلة
طراطير يا واد طراطير
طراطير طراطير طراطير
الليلة الليلة السيرك تعالوا
دي فرجة تساوي جنيه قولوا هيه
بمناسبة هذا المولد يا ولاد
برنامج سواريه قولوا هيه
في السيرك شجيع يهجم عالسبع
ويركب دوغري عليه قولوا هيه
وبنات قمرات زي الشربات
حلوين مش عارف ليه قولوا هيه
وكمان بلياتشو تعالوا إسمعوا ناتشه
وشوفوا هيعمل إيه قولوا هيه
هيه هيه هيه
أنا شجيع السيما أبو شنب بريمة
أول ما أقول عليهوب و أصرخلي صرخة
السبع يتكهرب و يبقى فرخة
حالاً بالاً سأصارع أسد إنما إيه متوحش
وهخلي وجهه شوارع تسقيفة يا ناس ميصحش
أهو جه أهو جه تسقيفة بقا
تسقيفة أمال تشجيعة أمال
تعالالي الالي اللالي يا حبيبي تعالالي
السمك مقلي كل و برقلي صنف زي الفل
استخار و إختار فشة أو ممبار
يالا سمي و كل
يا ام المطاهر رشي الملح سبع مرات
بمقامه الطاهر خشي و قيدي سبع شمعات
يا عريس يا صغير علقة تفوت و لا حد يموت
لابس و مغير و هتشرب مرقة كتكوت
بالزمة دة سابع عيل مزفوف من وقت قليل
مولد شالله يا معلم عقبال أولادك
كلم واحد مظبوط و إتنين مصري
عمك حاضر جايلك دوغري
مسا التماسي مسا التماسي
ياورد قاعد على الكراسي
هات شاي يا دقدق عيني و راسي
سمعنا يا ريس حنتيرة
للصبح معاك السهيرة
سمعنا سمعنا
يا غزال يا غزال العشق حلال
دوبتني دوب خلتني خيال
يا شفتك فص فراولة و أنا لا قوة و لا حول
دوختلي قلبي على اولة
أه يا غزال العشق حلال
يارب يا عالم بالحال
تهدي حبيبي و يصبح عال
و أغني و أرجع بالموال و أقول يا غزال
وقف ياريس حنتيرة في ناس هنا قاعدة كتيرة
ولا حد قال هات تعميرة و لا واحد شاي
أه اللي هيطلب راح يقعد
و اللي ما يطلبش يبعد
يالابنا نخرج يا مسعد شارع التورماي
ورينا القوة يا بني إنت وهو
مين عنده مروه و عاملي فتوة
يقدر بقدارة على زق التارة و يفرقع بمبة
وسع وسع وسع وسع
أنا أزق التارة و أضرب ميت بمبة
دانا الاسطى عمارة من درب شكمبة
سيطي من القلعة م القلعة
لسويقة اللالة لا لا لاله
أنا واخد السمعة
طب يالا تعالى
لاياعم سعيدة هأأو
دي البدلة جديدة
ههههأه سعيدة يابو بدلة جديدة
إوعد يارب إوعد أدي كمان قهوة
يالابنا يا مسعد ندخل على سهوة
طار في الهوا شاشي و إنت متدراشي
طارفه شاورلي شاورلي عليك
حكم الهوى ماشي
هوا العصاري على سطح جاري
خدني و رماني عليك و لا إنت داري
أهين يا ناري منك يا جاري
خدني ورماني رماني عليك هوا العصاري
طار في الهوا شاشي و إنت متدراشي
طارفه شاورلي شاورلي عليك
ماشي ماشي ماشي كلامك
اللي هيطلب راح يقعد و اللي مايطلبش يبعد
يالابنا نخرج يا مسعد شارع التورماي
ناس من بلدنا هناك أهم
روح يا إبراهيم إندهلهم
سلامات سلامات سلامات
سلامات ع البلديات
ليلتكوا أنس و جلجلة إنشد و لعلع يا ولا
شفت في منام صاحب المقام دة أوبهة
و يمامة حايمة عليه بتسبح ربها
ميلت فوق يده وجيت أحبها
صحوني من النوم خدت بعضي
وتني جاي و بعودة حي
ياولاد الحلال بنت تايهة طول كدة
رجلها الشمال فيها خلال زي دة
زحمة يا ولداه كام عيل تاه؟؟
اليلة الكبيرة يا عمي و العالم كتيرة
ماليين الشوادر يابا في الريف و البنادر
